ރާއްޖޭގެ ޤައުމީ ބޭންކް، ބޭންކް އޮފް މޯލްޑިވްސް (ބީއެމްއެލް)ގެ މުވައްޒަފުންތަކެއް ހިންގާފައިވާ ބޮޑު ޚިޔާނާތެއްގެ މައްސަލައެއް އެ ބޭންކުން ބަލަން ފަށައިފި އެވެ.
"އައްޑޫލައިވް" އަށް އެނގިފައިވާ ގޮތުގައި ބީއެމްއެލްގެ އޮޑިޓަރުން ދަނީ މިހާރު މި މައްސަލަ ބަލަމުންނެވެ. ނަމަވެސް މިކަމާއި ބެހޭ އިތުރު އެއްވެސް ތަފްސީލެއް ބީއެމްއެލް އިން ހާމަކޮށްފައެއް ނުވެއެވެ.
ބީއެމްއެލްގެ ޚިޔާނާތުގެ މައްސަލައިގެ ވާހަކަތައް ސޯޝަލް މީޑިއާގައި ވެސް މިހާރު ފެތުރިފައިވާއިރު، ބައެއް މީހުން ބުނާ ގޮތުގައި މި ޚިޔާނާތުގެ ޖުމްލަ އަގު 8 މިލިއަން ދިވެހި ރުފިޔާ އަށް އަރާ ކަމަށެވެ. ނަމަވެސް، އެ މައްސަލައިގައި ތުހުމަތުކުރެވޭ މުވައްޒަފުންގެ އަދަދު އަދި އެމީހުން ޚިޔާނާތްތެރިވެފައިވާ ފައިސާގެ އަދަދާއި ބެހޭ އެއްވެސް މަޢުލޫމާތެއް އަދި ސާފެއް ނުވެއެވެ.
ބީއެމްއެލް އިން މީގެ ކުރިން ބުނެފައިވާ ގޮތުގައި އެ ކުންފުނީގެ އެއްވެސް މުވައްޒަފަކު، ޤަވާއިދާއި ޚިލާފު އެއްވެސް ޢަމަލެއް ހިންގައިފިނަމަ، އެކަމެއް ތަޙުޤީޤުކޮށް އަޅަން ޖެހޭ އެންމެ ހަރުކަށި ފިޔަވަޅު ބޭންކުން އަޅާނެ ކަމަށެވެ.