ބެޗްލަރ އޮފް މެޑިސިން އެންޑް ބެޗްލަރ އޮފް ސާޖަރީ (އެމް.ބީ.ބީ.އެސް) އާއި ބެޗްލަރ އޮފް ޑެންޓަލް ސާޖަރީ (ބީ.ޑީ.އެސް) ހެދުމަށް ބޭނުންވާ ތައުލީމީ ފާސްތަކުގެ ތެރޭގައި ހިމަނާފައިވާ ޕްރީ-މެޑިސިންގ ނުވަތަ އެފެންވަރުގެ ސެޓްފިކެޓްތައް ގަބޫލްކުރުން މިއަދުން ފެށިގެން މޯލްޑިވްސް މެޑިކަލް އެންޑް ޑެންޓަލް ކައުންސިލުން ހުއްޓާލައިފި އެވެ.
ޕްރީމެޑިސިން ކޯހަކީ ޖީ.ސީ.އީ އޭލެވެލްގެ ބަދަލުގައި ހަދަމުން އަންނަ 1 (އެކެއް) އަހަރު ދުވަހުގެ ކޯހެކެވެ. ޕްރީ-މެޑް ކޯސްތަކަކީ ބޭރު ޤައުމްތަކުގައި މިހާރުވެސް ހިންގަމުން އަންނަ، ދުނިޔޭގެ ފެންވަރުގައި ވެސް ޤަބޫލުކުރާ ކޯހެކެވެ.
މެޑިކަލް ކައުންސިލުން މިއަދު ކުރި އިއުލާނެއްގައި ބުނެފައި ވަނީ ފަހަކަށް އައިސް ޕްރީ-މެޑް ކޯސްތައް، ބައެއް ޤައުމުތަކުގައި ފަރުމާކުރެވިފައިވާ ގޮތުން ދަރިވަރުންގެ ތައުލީމީ ފެންވަރު ދަށްވަމުން ދާކަމަށާއި، 1 (އެކެއް) އަހަރު ދުވަހުގެ ޕްރޮގްރާމްތަކުގެ ނަމުގައި 6 މަސްދުވަހުގެ ޕްރޮގްރާމްތައް ވެސް ހިންގާކަން ފާހަގަކުރެވޭ ކަމަށެވެ.
އެ އިއުލާނުގައި އިތުރަށް ބުނެފައި ވަނީ އެއް އަހަރު ދުވަހުގެ ޕްރީ މެޑިސިންގ ކޯހަކީ ދުނިޔޭގެ ގިނަ މެޑިކަލް ކައުންސިލްތަކުން ތަރުހީބު ދޭ ޕްރޮގްރާމްއެއް ނޫން ކަމަށެވެ.
އަދި ޕްރީ-މެޑް ކޯސްތަކުން، ދިވެހި ދަރިވަރުންނަށް ނަފުސާނީ ގޮތުންނާއި އަދި މާލީގޮތުން ގެއްލުން ލިބޭކަމުގެ ޝަކުވާތައް ބައެއް ފަރާތްތަކުން އެ ކައުންސިލަށް ލިބިފައިވާ ކަމަށާއި، ޖީ.ސީ.އީ އޭލެވެލްގެ ބަދަލުގައި، 1 އަހަރު ދުވަހުގެ ޕްރީ-މެޑިސިންގ ޕްރޮގްރާމެއް ނިންމި ކަމުގައި ވިޔަސް، ދުނިޔޭގެ މަޝްހޫރު ގިނަ ޔުނިވާރސިޓީ ތަކުން، އެމް.ބީ.ބީ.އެސް އަދި ބީ.ޑީ.އެސް އަށް ވަނުމަށް ކަނޑައަޅާފައިވާ ޝަރުތުތައް ފުރިހަމަ ނުވާކަމަށްވެސް އެ އިއުލާނުގައި ބުނެފައި ވެއެވެ.
މެޑިކަލް ކައުންސިލުން ބުނީ ޕްރީ- މެޑިސިން ޕްރޮގްރާމްތައް ގަބޫލުކުރުން ހުއްޓާލި ކަމުގައި ވިޔަސް، ތިރީގައި ބަޔާން ކޮށްފައިވާ ފަރާތްތައް އިސްތިސްނާ ކުރުމަށް ނިންމާފައިވާ ކަމަށެވެ.
1. ޕްރީމެޑިސިން ހެދުމަށްފަހު މެޑިސިންގ/ޑެންޓިސްޓްރީ މިހާރު ކިޔަވަމުންދާ ފަރާތްތައް.
2. 14 ޖަނަވަރީ 2019 މިތާރީހުގެ ކުރިން ޕްރީމެޑިސިން ނިންމާފައި، މެޑިކަލް/ޑެންޓަލް ކޮލެޖަކުން ޖާގަ ހޯދަމުންދާ ފަރާތްތައް.
3. 14 ޖަނަވަރީ 2019 ގެ ކުރިން ޕްރީމެޑިސިން ހަދަމުންދާ ފަރާތްތައް.
4. 2019 ވަނަ އަހަރުގެ ތެރޭގައި ހިންގާ ޕްރީމެޑިސިންގ ޕްރޮގްރާމަކުން، 14 ޖަނަވަރީ 2019 ވަނަ ދުވަހުގެ ކުރިން ޖާގަ ލިބި ފައިސާ ދައްކާފައިވާ ފަރާތްތައް.
މެޑިކަލް ކައުންސިލްގެ މި ނިންމުމާއެކު، ގިނަ ދަރިވަރުންތަކެއް ދަނީ ކަންބޮޑުވުން ފާޅުކުރަމުންނެވެ.