ޖުމުހޫރީ ޕާޓީގެ ޕާލަމެންޓްރީ ގްރޫޕުގައި ހިމެނިވަޑައިގަންނަވާ ދިއްދޫ ދާއިރާގެ މެމްބަރު އަބްދުއްލަތީފް، އިއްޔެ އިންތިޚާބުތަކާ ބެހޭ ގާނޫނަށް ހުށައެޅުއްވި އިސްލާހަކީ ރައީސް މުހައްމަދު ނަޝީދުގެ އަސާސީ ހައްގެއް ގެއްލިދާފަދަ އިސްލާހަކަށް ވާތީ، އެ ބިލް އަނބުރާ ނެގުމަށް ޖޭޕީން ލަތީފަށް އަންގައިފިއެވެ.
ޖޭޕީގެ ޕީޖީ ލީޑަރ އަބްދުﷲ ރިޔާޒު މިއަދު ކުރެއްވި ޓުވީޓެއްގައި ވިދާޅުވީ، މެމްބަރު ލަތީފް އެ އިސްލާހު ހުށައެޅުއްވީ ޖޭޕީއާ މަޝްވަރާ ކުރެއްވުމެއް ނެތި ކަމަށާއި އެހެންކަމުން އެ އިސްލާހު އަނބުރާ ނެންގެވުމަށް ލަތީފަށް ޖޭޕީގެ ފަރާތުން އަންގަވާފައިވާނެ ކަމަށެވެ.
އިންތިޚާބުތަކާ ބެހޭ ގާނޫނަށް ލަތީފް ހުށައެޅި އިސްލާހަކީ، ރާއްޖޭގެ ރައީސްކަން ކުރައްވާފައިވާ ބޭފުޅަކަށް ރައްޔިތުންގެ މަޖިލީހުގެ އިންތިޚާބުގައި ވާދަނުކުރެވޭނެ ކަމަށް ކަނޑައަޅައި ގާނޫނު އިސްލާހު ކުރުމަށް ހުށައެޅި ބިލެކެވެ.
ކުރީގެ ރައީސް މުހައްމަދު ނަޝީދު މަޖިލީހަށް ވާދަކުރައްވަން ނިންމަވާފައިވަނިކޮށް މި ބިލް ހުށައަޅާފައިވާއިރު ގާނޫނީ ވަކީލުން ވަނީ އެ އިސްލާހުގެ ސައްހަކަމާ މެދު ސުވާލު އުފައްދަވާފައެވެ.
އެގޮތުން، މަޝްހޫރު ގާނޫނީ ވަކީލު މަހްފޫޒް ސައީދު ކުރެއްވި ޓުވީޓެއްގައި ވިދާޅުވީ ރައްޔިތުންގެ މަޖިލިސްގެ އިންތިޚާބުގައި ބައިވެރިވުމުގެ ޝަރުުތުތައް ގާނޫނު އަސާސީގެ 73 ވަނަ މާއްދާގައި ބަޔާން ވެފައިވަނިކޮށް، ގާނޫނެއް ފާސްކޮށްގެން ޝަރުތެއް އިތުރުކުރުން ގާނޫނާއި ޚިލާފު ކަމަށެވެ. އަދި އެފަދަ އިސްލާހެއް މަޖިލީހަށް ބަލައިގަނެވިގެން ވެސް ނުވާނެ ކަމަށް އޭނާ ވިދާޅުވިއެވެ.