ބޭންކް އޮފް މޯލްޑީވްސްގެ ބޮޑު ޚިޔާނާތުގެ މައްސަލައެއް ބޭންކުން ބަލަމުންދަނިކޮށް ދެ މުވައްޒަފަކު ކުއްލި ގޮތަކަށް ސަސްޕެންޑުކޮށްފިއެވެ.
ރާއްޖޭގެ އެންމެ ބޮޑު ބޭންކުން މިމައްސަލަ ސީރިއަސް މައްސަލައެއްގެ ގޮތުގައި ބަލަމުން އަންނައިރު މުވައްޒަފުންތަކެއް ވަނީ ބޭންކުގެ ފައިސާއިން މިލިއަނުން ޚިޔާނާތްތެރިވެފައެވެ. ޚަބަރު ލިބޭ ގޮތުގައި މިފައިސާގެ އަދަދު އަށް މިލިއަން ރުފިޔާއަށް އަރައެވެ.
ނަމަވެސް ސީދާ އަދަދެއް ބޭންކުގެ އިންޓާނަލް އޮޑިޓް ނުނިމެނީސް ބުނަން ނޭނގޭނެ ކަމަށް ބޭންކުން ބުނެއެވެ. ދެ މުވައްޒަފަކު މިހާތަނަށް މަގާމުން ދުރުކޮށްފައިވާއިރު ބޭންކުން ބުނެފައިވަނީ މިފަދަ ކަމެއް ހިނގައިފިނަމަ ދަނެގަތުމަށް ހަރުދަނާ ގަވާއިދުތަކެއް ހެދިފައިވާ ކަމަށެވެ.
އަދި މުވައްޒަފަކު ގަވާއިދާއި ޚިލާފު ކަމެއް ކުރިކަމަށް ތުހުމަތުކުރެވޭނަމަ ތަހުގީގީ އިދާރާއެއް މެދުވެރިކޮށް އެ މައްސަލަ ބަލައި ފިޔަވަޅު އަޅާނެ ކަމަށް ބީއެމްއެލްގެ އިސް އޮފިޝަލަކާ ހަވާލާދީ "މިހާރު" ނޫހުން ރިޕޯޓުކޮށްފައިވެއެވެ.
މިމައްސަލަ ބޭންކުން އަމިއްލައަށް ބަލަމުން އަންނައިރު އަދި ފުލުހުންނަށް މައްސަލަ ހުށައަޅާފައެއް ނުވެއެވެ.