އައްޑޫ ސިޓީގައި ޓްރާންސްޕޯޓް އޮތޯރިޓީ އިން ދެމުން ގެންދިޔަ ޚިދުމަތްތައް، އައްޑޫސިޓީ ކައުންސިލްގެ ބެލުމުގެ ދަށަށް ރަސްމީކޮށް މިއަދު ބަދަލުކޮށްފި އެވެ.
ކުރިންވެސް ކައުންސިލުން ދެމުން ގެންދިޔަ މި ޚިދުމަތްތައް އަލުން ކައުންސިލަށް ބަދަލުކުރުމަށް ބޭއްވި ހަފުލާގައި މިކަން ފަށްޓަވައި ދެއްވީ އައްޑޫ ސިޓީގެ މޭޔަރ އަބްދުﷲ ސާދިޤު (ސޯބެ) އެވެ.
މިރަސްމިއްޔާތުގައި މިނިސްޓަރ އޮފް ސްޓޭޓް ފޮރ ޓްރާންސްޕޯޓް އެނޑް ސިވިލްއޭވިއޭޝަން އަހުމަދު އާދިލް އާއި ޓްރާންސޕޯޓް އޮތޯރިޓީގެ ޑިރެކްޓަރ ޖެނެރަލް މުހައްމަދު ރަފީޢު އާއި ޑެޕިއުޓީ މޭޔަރ މުހައްމަދު ޔަސްރިފާއި ކައުންސިލަރުން ބައިވެރިވެވަޑައިގަތެވެ.
މިއަދުގެ ރަސްމިއްޔާތުގައި މި ޚިދުމަތް ފަށްޓަވައިދެއްވަމުން ސޯބެ ދެއްކެވި ވާހަކަފުޅުގައި މިއީ ވަރަށް އުފާވެރި ދުވަހެއް ކަމަށާއި ކައުންސިލްތަކަށް ބާރުތައް ދެއްވުމަށް ސަރުކަރުން ކުރައްވަމުންގެންދަވާ މަސައްކަތްޕުޅަށް ރައީސުލްޖުމްހުރިއްޔާ އަދި ސަރުކާރަށް ޝުކުރު އަދާކުރެއްވިއެވެ. ޓްރާންސްޕޯޓް މިނިސްޓަރ އާއިޝަތު ނަހުލާ، ސަރުކާރުގެ ވައުދުތައް ފުއްދުމުގައި ކުރައްވަމުންގެންދަވާ މަސައްކަތަށް ވެސް މޭޔަރ ޝުކުރު އަދާކުރެއްވިއެވެ.
ޓްރާންސްޕޯޓްގެ ޚިދުމަތައް ކައުންސިލުން ރައްޔިތުންނަށް ފޯރުކޮށްދެއްވުމުގައި އިހުނަށްވުރެވެސް ޚިދުމަތުގެ ފެންވަރު ރަނގަޅުކުރެއްވުމަށް މަސައްކަތްކުރައްވާނެ ކަމަށާއި، އެގޮތުން މަގުތަކުގައި ސައިންބޯޑުތައް ބެހެއްޓުމާއި، ދުއްވާތަކެއްޗަށް ފަސޭހައިން މަގުތައް ބޭނުންކުރެވޭގޮތަށް މަގުތައް މަރާމާތު ކުރުމާއި، ސްޕީޑް ބްރޭކަރުތައް ރަނގަޅުކުރުމާއި، ޕާކިންޒޯންތައް ހަދާނެ ކަމަށް މޭޔަރ ވިދާޅުވި އެވެ.
މި ރަސްމިއްޔާތުގައި ސްޓޭޓް މިނިސްޓަރ އާދިލް ވިދާޅުވީ، އެމިނިސްޓްރީން މަސައްކަތް ކުރައްވަނީ، ރައީސް އިބްރާހިމް މުހައްމަދު ސޯލިހު ވިދާޅުވެފައިވާ ގޮތުގެ މަތިން ރައްޔިތުންނަށް ވީހާވެސް ގާތުން ޚިދުމަތް ދިނުމަށާއި ކައުންސިލްތައް ބާރުވެރިކޮށް ކައުންސިލްގެ ބެއްލެވުމުގެ ދަށުން ކަންކަން ކުރިއަށް ގެންދިއުމަށް ކަމަށެވެ.
ޓްރާންސްޕޯޓް އޮތޯރިޓީން އައްޑޫގައި ދެމުން ގެންދިޔަ ޚިދުމަތް ކައުންސިލަށް ބަދަލުކުރުމާއެކު، އެ ޚިދުމަތް މިހާރު ދެމުން ގެންދާނީ ހިތަދޫ މުނިސިޕަލް ސަރވިސް އޮފީސް ހިނގަމުންދާ އިމާރާތުގައެވެ.
ހުޅުދޫއާއި މީދޫގެ ރައްޔިތުންނަށް ފަސޭހަކޮށްދިނުމުގެ ގޮތުން ކަނޑުދަތުރުފަތުރާއި، އެއްގަމު އުޅަނދާއި ގުޅޭ ޚިދުމަތައް އެދެރަށުން ލިބޭނެ އިންތިޒާމް ވަރަށް އަވަހަށް ހަމަޖައްސާނެ ކަމަށްވެސް ކައުންސިލުން ބުނެއެވެ.
ޓްރާންސްޕޯޓް އޮތޯރިޓީން އާއްމުންނަށް ފޯރުކޮށްދޭ ޚިދުމަތްތަކުގެ ތެރެއިން، އާއްމުންނަށް ފަސޭހަކޮށްދިނުމުގެ ބޭނުމުގައި އައްޑޫ ސިޓީގެ މަގުތަކާއި، އެއްގަމު އުޅނދާއި ގުޅޭ މައްސަލަތައް ހައްލުކުރުމަށް ޓްރާންސްޕޯޓް މިނިސްޓްރީ އާއި އައްޑޫ ސިޓީ ކައުންސިލާއި ދެމެދު އެއްބަސްވުމެއްގައި ވަނީ ސޮއިކޮށްފައެވެ.