ރާއްޖޭގެ ޤައުމީ ބޭންކް، ބޭންކް އޮފް މޯލްޑިވްސް (ބީއެމްއެލް)ގެ މުވައްޒަފުންތަކެއް ހިންގާފައިވާ ބޮޑު ޚިޔާނާތެއްގެ މައްސަލައާއި ގުޅިގެން ސަސްޕެންޑްކޮށްފައި ވަނީ ދެމަފިރިންކަން އެނގިއްޖެ އެވެ.
ބީއެމްއެލްގެ ބައެއް މުވައްޒަފުންނާއި ހަވާލާދީ "އަވަސް" ނޫހުން ރިޕޯޓްކުރާ ގޮތުގައި އެ މައްސަލައާއި ގުޅިގެން ސަސްޕެންޑް ކުރީ ބޭންކްގެ ވަކި ދެ ޑިޕާޓްމަންޓެއްގައި މަސައްކަތް ކުރާ ދެ މުވައްޒަފަކު ކަމަށާއި، އެ ދެ މީހުންނަކީ ދެމަފިރިން ކަމަށެވެ. އަދި މިފަހަކަށް އައިސް އެމީހުން ވަނީ އާންމުދަނީއާ ނުބައްދަލު އަގުބޮޑު ދިރިއުޅުމެއް އުޅެފައި ކަމަށްވެސް މަޢުލޫމާތު ލިބެއެވެ.
އިއްޔެ ފެންމަތިވި މި ޚިޔާނާތުގެ މައްސަލަ ބީއެމްއެލްގެ އޮޑިޓަރުން މިހާރު ބަލަމުންދާ ކަމަށް މަޢުލޫމާތު ލިބެއެވެ. ނަމަވެސް މިކަމާއި ބެހޭ އިތުރު އެއްވެސް ތަފްސީލެއް ބީއެމްއެލް އިން ހާމަކޮށްފައެއް ނުވެއެވެ.
ބީއެމްއެލްގެ ޚިޔާނާތުގެ މައްސަލައިގެ ވާހަކަތައް ސޯޝަލް މީޑިއާގައި ވެސް މިހާރު ފެތުރިފައިވާއިރު، ބައެއް މީހުން ބުނާ ގޮތުގައި މި ޚިޔާނާތުގެ ޖުމްލަ އަގު 8 މިލިއަން ދިވެހި ރުފިޔާ އަށް އަރާ ކަމަށެވެ.
ބީއެމްއެލް އިން މީގެ ކުރިން ބުނެފައިވާ ގޮތުގައި އެ ކުންފުނީގެ އެއްވެސް މުވައްޒަފަކު، ޤަވާއިދާއި ޚިލާފު އެއްވެސް ޢަމަލެއް ހިންގައިފިނަމަ، އެކަމެއް ތަޙުޤީޤުކޮށް އަޅަން ޖެހޭ އެންމެ ހަރުކަށި ފިޔަވަޅު ބޭންކުން އަޅާނެ ކަމަށެވެ.
މިމައްސަލަ ބޭންކުން އަމިއްލައަށް ބަލަމުން އަންނައިރު އަދި ފުލުހުންނަށް މައްސަލަ ހުށައަޅާފައެއް ނުވެއެވެ.