މި ސީޒަނަށް ފަހު އާސެނަލްގެ ގޯލްކީޕަރު ޕީޓަ ޗެކް ކުޅުން ހުއްޓާލާނެ ކަމަށް އޭނާގެ ރަސްމީ ޓުވިޓާ އެކައުންޓުގައި އިއުލާންކޮށްފި އެވެ.
އުމުރުން 36 އަހަރުގެ ޗެކްގެ ފުޓްބޯޅަ ކެރިއަރުގެ އެންމެ ކާމިޔާބު ދުވަސްވަރަކީ އޭނާ ޗެލްސީގައި ހޭދަކުރި ދުވަސްތަކެވެ. އޭނާ ޗެލްސީ އަށް ބަދަލުވީ 2004 ވަނަ އަހަރު ފްރާންސްގެ ރެނެސް އިންނެވެ. އޭގެފަހުން އެ ކްލަބުގައި ހޭދަކުރީ 11 އަހަރުގެ ތެރޭގައި އޭނާ ވަނީ 13 މުބާރާތެއްގެ ތަށި ހޯދައިފައެވެ. އެގޮތުން، ޗެލްސީ އާއެކު ޕްރިމިއާ ލީގާއި އެފްއޭކަޕްގެ ތަށި ހަތަރު ފަހަރު ހޯދިއިރު ޔުއެފާ ޗެމްޕިއަންސް ލީގު އަދި ޔުރޮޕާ ލީގު އެއް ފަހަރު ކާމިޔާބުކޮށްފައިވެއެވެ.
"ޕްރިމިއާ ލީގުގައި ހޭދަކުރީ 15 އަހަރު ދުވަހުގެ ތެރޭގައި ކުޅުންތެރިއަކަށް ލިބެންޖެހޭ ހުރިހާ ޓްރޮފީ އެއް މިހާތަނަށް ލިބިފައިވާއިރު އަހަރެން ގަބޫލްކުރަނީ ބޭނުންވި ހުރިހާ ލަނޑުދަނޑިއެއް ހާސިލްކުރެވިފައިވާ ކަމަށް." ޗެކް ބުންޏެވެ.
— Petr Cech (@PetrCech) January 15, 2019
ޗެލްސީ ދޫކޮށް ޗެކް، އާސެނަލަށް ބަދަލުވީ 2015 ވަނަ އަހަރުގެ ޖުލައި މަހުގައެވެ. އެ ކްލަބުގައި މިހާތަނަށް ހޭދަކުރީ ތިން ސީޒަނުގައި އޭނާ ވަނީ އެއް ފަހަރު އެފްއޭކަޕްގެ ތަށި ހޯދައިފައެވެ. މީގެއިތުރުން، އޭނާ ވަނީ ޗެލްސީ އަދި އާސެނަލް އާއެކު ޕްރިމިއާ ލީގުގެ ރެކޯޑެއްކަމަށްވާ މުޅި ޖުމްލަ 162 މެޗުގައި ލަނޑެއްވަނަނުދީ ހިފަހައްޓާފައެވެ.
2006 ވަނަ އަހަރުގެ އޮކްޓޫބަރު މަހު ރެޑިން އާ ދެކޮޅަށް ޗެލްސީ ކުޅުނު މެޗެއްގައި ބޮލުގެ ނާށިގަނޑަށް ލިބުނު އަނިޔާއަކާއި ގުޅިގެން ހެދި ސާޖަރީ އަށް ފަހު ޗެކްގެ ފުޓްބޯޅަ ކެރިއަރު އެ ހިސާބުން ނިމުނީކަމަށް ގިނަ ބަޔަކު ގަބޫލުކުރިނަމަވެސް ތިން މަސްދުވަހަށް ފަހު އޭނާ ވަނީ ކުޅުމަށް އެނބުރި އައިސްފައެވެ. އަނިޔާއަށްފަހު ޗެކް ފުޓްބޯޅަ ކުޅެމުންދަނީ ބޮލުގައި ހެޑް ގާޑެއް އަޅައިގެންނެވެ.
"މިއީ އަހަރެންގެ ޕްރޮފެޝަނަލް ފުޓްބޯޅަ ކެރިއަރުގެ 20 ވަނަ އަހަރަށްވާއިރު މިއީ ކުޅުން ހުއްޓާލަން އެންމެ ރަނގަޅު ދަނޑިވަޅުކަމަށް ދެކެނީ." ޗެކް ބުންޏެވެ.
"އަހަރެންގެ އުއްމީދަކީ މި ސީޒަނުގައި އާސެނަލް އާއެކު ޓްރޮފީ އެއް ހޯދުން." ޗެކް ބުންޏެވެ.
އޭނާގެ ކްލަބް ކެރިއަރުގައި ޗެލްސީ އާއި އާސެނަލްގެ އިތުރުން ރެނޭސް އަދި ސްޕާޓާ ޕްރާގަށް ވަނީ ކުޅެފައެވެ. އެގޮތުން، އޭނާ ވަނީ މި ހަތަރު ކްލަބަށް ޖުމްލަ 700 އަށް ވުރެ ގިނަ މެޗު ކުޅެދީފައެވެ.
ޗެކް ރިޕަބްލިކްގެ ގައުމީ ޓީމަށް 124 މެޗު ކުޅެދީފައިވާ ތަޖުރިބާކާރު ގޯލްކީޕަރު ޗެކް އަށް ގައުމީ ޖާޒީގައި ފާހަގަކޮށްލެވޭ ކާމިޔާބީއެއް ލިބިފައިނުވީނަމަވެސް އޭނާ ވަނީ ޔޫރޯ 2004 ވަނަ އަހަރުން ފެށިގެން 2016 ވަނަ އަހަރުގެ ނިޔަލަށް ހަތަރު މުބާރާތެއްގައި އެ ގައުމު ތަމްސީލްކޮށްފައެވެ. މީގެއިތުރުން، އޭނާ ވަނީ 2006 ވަނަ އަހަރު ޖަރުމަނުގައި ބޭއްވި ވޯލްޑްކަޕްގައިވެސް ކުޅެފައެވެ.