އިނގިރޭސިން އީޔޫއިން ވަކިވުމަށް ނެގި ވޯޓަށް ފަހު ބޮޑުވަޒީރު މޭ އިނގިރޭސި މަޖިލީހަށް ހުށައެޅި ބްރެކްސިޓް ޑީލް މަޖިލީހުން ފާސްނުވެ ބޭރުކޮށްލައިފިއެވެ.
މޭގެ ހުށައެޅުމަށް އެންމެ 202 މެމްބަރުން ވޯޓު ދީފައިވާއިރު 432 މެމްބަރުން ވަނީ ދެކޮޅަށް ވޯޓުދީ މަޖިލީހުން ބޭރުކޮށްލައިފިއެވެ. "ބީބީސީ" އިން ރިޕޯޓުކޮށްފައިވާ ގޮތުގައި މިއީ އިނގިރޭސި ސަރުކާރުގެ ހުށައެޅުމެއް 1924 ވަނަ އަހަރުން ފެށިގެން މިހާ ބޮޑު ތަފާތަކުން ބަލިވި ފުރަތަމަ ފަހަރެވެ.
މޭ އަށް ކުރިމަތިވި މި ބޮޑު ނާކާމިޔާބީއާއެކު ލޭބަ ޕާޓީގެ ލީޑަރ ކޯބީން ވަނީ ސަރުކާރުގެ އިތުބާރު ނެތްކަމުގެ ވޯޓަކަށް ހުށައަޅާފައެވެ. މި ވޯޓު ފާސް ވެއްޖެނަމަ އާންމު އިންތިޚާބެއް އިނގިރޭސި ވިލާތުގައި ބާއްވަން ޖެހޭނެއެވެ.
ބޮޑުވަޒީރު ތެރޭސާ މޭ ވަނީ އީޔޫއިން ވަކިވުމާ ބެހޭ އެއްބަސްވުން މަޖިލީހަށް ހުށައެޅުމުގެ ކުރިން މުރާޖައާ ކުރުމުގައި ދެ އަހަރު ދުވަހު މަސައްކަތް ކޮށްފައެވެ. މިއަހަރުގެ މާޗު 29 ވަނަ ދުވަހު އީޔޫ އިން ބްރިޓެއިން ވަކިވެ، 21 މަހުގެ ޓްރާންސިޝަން މުއްދަތެއް ގާއިމުކޮށް ފްރީ ޓްރޭޑް އެއްބަސްވުމެއް ގާއިމްކުރުމަށް މޭ ވަނީ ހުށައަޅާފައެވެ.
މަޖިލީހުން އެއްބަސްވުން ބަލައިނުގަތުމުން ދެން ކުރިއަށްދާނެ ގޮތަކާ މެދު މަޝްވަރާ ކުރަން ގައުމުތައް ވަނީ ފަށާފައެވެ. ނަމަވެސް އަދިވެސް ބެލެވެނީ މާޗު 29 ވަނަ ދުވަހު ގްރޭޓް ބްރިޓެއިންގެ ގައުމުތައް އީޔޫއިން ވަކިވާނެ ކަމަށެވެ.
މޭ އަށް ދިމާވެފައިވާ އެންމެ ބޮޑު ގޮންޖެހުމަކީ އެކަމަނާގެ އަމިއްލާ ޕާޓީގެ މެމްބަރުންގެ އިތުބާރުވެސް ނެތުމެވެ. އެހެންކަމުން މޭ ގެ އިތުބާރު ނެތްކަމުގެ ވޯޓު އަނެއްކާ ނެގި ފާސްވުމުގެ ފުރުސަތުވެސް ބޮޑެވެ. އެންމެ ފަހަކަށް ނެގި އިތުބާރު ނެތްކަމުގެ ވޯޓު މޭ ވަނީ ކާމިޔާބު ކުރައްވާފައެވެ.