ހދ. ކުޅުދުއްފުށީގައި ނެއިބަރހުޑް ޕޮލިސްގެ ޚިދުމަތް ތަޢާރަފްކުރުމަށް ހިންގާ ޕައިލެޓް ޕްރޮޖެކްޓްގެ ތެރެއިން، އާންމު ރައްޔިތުންގެ ޚިޔާލު ހޯދައި މަޝްވަރާކުރުމުގެ ޕްރޮގްރާމެއް ފަށައިފިއެވެ.
ފުލުހުން ބުނީ މިދިޔަ ހޯމަ ދުވަހުން ފެށިގެން އަންނަ ހޮނިހިރު ދުވަހާއި ހަމައަށް ކުރިއަށް ގެންދާ މިޕްރޮގްރާމްގެ ދަށުން، ކުޅުދުއްފުށީގައި ހުރި ސަރުކާރުގެ މުއައްސަސާތަކަށާއި އަމިއްލަ އޮފީސްތަކަށާއި ގޭގެއަށާއި ފިހާރަތަކަށް ޒިޔާރަތްކޮށް އާންމު ރައްޔިތުންގެ ޚިޔާލު ހޯދައި މަޝްވަރާ ކުރުމަށް ހަމަޖެހިފައިވާ ކަމަށެވެ.
އެގޮތުން ނެއިބަރހުޑް އޮފިސަރުންނާ އާންމު ރައްޔިތުންނާ އޮންނަ ގުޅުން ބަދަހިކުރުމާއި، އާންމު ރައްޔިތުންގެ ހުރި ކަންބޮޑުވުންތައް ދެނެގަނެ އެކަންކަން ޙައްލުކުރުމަށް ކުރެވިދާނެ ކަންކަމާގުޅޭ ގޮތުންނާއި، އަދި ކުށުގެ ބިރުވެރިކަން ކުޑަކޮށް ރަށުތެރޭގައި އަމާންކަން ޤާއިމްކުރުމަށް ކުރަންޖެހޭ ކަންކަން ދެނެގަނެ އެކަންކަމަށް އަވަސް ފިޔަވަޅުތަކެއް އެޅުމަށް ކުރެވިދާނެ ކަންކަމާއި ގުޅޭގޮތުން މަޝްވަރާކުރުމަށް ހަމަޖެހިފައިވާ ކަމަށްވެސް ފުލުހުން ބުނެއެވެ.
މީގެ އިތުރުން ފުލުހުން ބުނީ ނެއިބަރހުޑް އޮފިސަރުންގެ ފަރާތުން ރައްޔިތުން ބޭނުންވާ ކަންކަމަކީ ކޮަބައިކަން އޮޅުންފިލުވައި ޖިނާޢީ ޢަދުލުގެ ނިޒާމުގައި ހުރި ކަންމާއި ގުޅޭގޮތުން މަޢުލޫމާދު ދިނުމަށް ވެސް ހަމަޖެހިފައިވާ ކަމަށެވެ.