ކުރީގެ އެކްޓިން ކޮމިޝަނަރ އޮފް ޕޮލިސްގެ މަގާމުގައި ހުންނެވި އަބްދުﷲ ނަވާޒް ޖޭޕީ ޓިކެޓުގައި ރައްޔިތުންގެ މަޖިލީހުގެ ގަލޮޅު ދެކުނު ދާއިރާއަށް ވާދަކުރައްވަން ނިންމަވައިފިއެވެ.
ރައީސް ކަމާ އިބްރާހިމް މުހައްމަދު ސޯލިހް ހަވާލުވެވަޑައިގަތުމަށް ފަހު ނަވާޒް މަގާމުން ދުރުކޮށްފައިވަނިކޮށް ރޭ ކުއްލި ގޮތަކަށް ސިޔާސީ ދާއިރާއަށް، ކޯލިޝަންގައި ހިމެނޭ ޖޭޕީއަށް ސޮއިކޮށް ނިކުމެވަޑައިގަތީ ގޭގައި ހުރުމުގެ ބަދަލުގައި ރައްޔިތުންނަށް ޚިދުމަތް ކުރެއްވުމަށް ކަމަށް އޭނާ ވިދާޅުވިއެވެ.
އަދި ރައްޔިތުންގެ މަޖިލީހަކީ ގާބިލް ކުޅަދާނަ މީހުން ތިބެގެން ރައްޔިތުންނަށް ޚިދުމަތް ކުރެވޭނެ ތަނެއް ކަމަށް އޭނާ ވިދާޅުވިއެވެ.
ކުރީގެ ރައީސް ޑރ. މުހައްމަދު ވަހީދު ހަސަން މަނިކުގެ ވެރިކަމުގައި ފުލުހުންގެ ކޮމިޝަނަރަކަށް ހުންނެވި އަބްދުﷲ ރިޔާޒް ވަނީ ޔާމީން ވެރިކަމަށް ވަޑައިގެންނެވުމުން ކޮމިޝަނަރ ގެ މަގާމު ދޫކުރައްވައި މަޖިލީހަށް ވާދަކޮށް ކިނބިދޫ ދާއިރާގެ ގޮނޑި، ޖޭޕީގެ ސްލޮޓުގައި ކާމިޔާބު ކުރައްވާފައެވެ.
ރިޔާޒަކީ މިހާރު ޖޭޕީގެ ޕާލަމެންޓްރީ ގްރޫޕުގެ ލީޑަރެވެ. އަދި ޖޮއިންޓް ޕާލަމެންޓްރީ ގްރޫޕުގެ ލީޑަރުކަން ވެސް މަޖިލީހުގައި ކުރައްވަނީ ރިޔާޒެވެ. އޭނާ ވަނީ ކުރިއަށް އޮތް މަޖިލިސް އިންތިޚާބުގައި ތިމަރަފުށި ދާއިރާއަށް ވާދަކުރައްވަން ނިންމަވާފައެވެ.