ހުއިފިލަނޑާ ނަގަން ރ. އަތޮޅު ރަސްމާދޫ މޫދަށް އެރިއުޅުނު ޒުވާނަކު ގެއްލިގެން ހޯދަން ފަށައިފިއެވެ.
ފުލުހުންނާ ހަވާލާދީ "ސަން" އިން ރިޕޯޓުކޮށްފައިވާ ގޮތުގައި ޒުވާނަކު ގެއްލިގެން މިއަދު ހެނދުނު 10:25 ގައި ރިޕޯޓުކޮށްފައިވާ ކަމަށެވެ.
ގެއްލިގެން ހޯދަނީ ރ، ދުވާފަހު، ފެހިހިޔާގެ، އަބްދުﷲ އާދަމް، 32، ކަމަށެވެ. އާދަމް، ހުއިފިލަނޑާގެ މަސްވެރިކަމަށް ނިކުތީ "އަންބަރާ" ކިޔާ ދޯންޏެއްގައި މިއަދު ހެނދުނު 8:45 އެހާކަށްހާއިރު ކަމަށް މައުލޫމާތު ލިބިފައިވެއެވެ.
އަދި އޭނާ ގެއްލިގެން އުޅޭކަން އެމްއެންޑީއެފްގެ ކޯސްޓު ގާޑަށް 10:30 ގައި އަންގާފައިވާނެ ކަމަށް ފުލުހުން ބުނެއެވެ.
ހުއިފިލަނޑާގެ މަސްވެރިކަން ކުރަން އޭނާ ނިކުތީ ދޯންޏެއްގައެވެ. ދޯނީގެ ވެރިފަރާތުން އޭނާ ގެއްލިގެން ރިޕޯޓުކުރީ ފިނީތާ ގިނައިރުވެ ޚަބަރެއް ނުވެގެންނެވެ.
އާދަމް ހޯދުމުގެ މަސައްކަތް އެމްއެންޑީއެފްގެ ނޮދަން އޭރިޔާގެ ކޯސްޓު ގާޑުން މިހާރު ވަނީ ފަށާފައެވެ.