ހުޅުމާލޭގައި ހިނގި މާރާމާރީއެއްގައި އުމުރުން 17 އަހަރުގެ ޒުވާނަކު ޒަޚަމްކޮށްލައިފި އެވެ.
ހުޅުމާލޭ ހޮސްޕިޓަލާއި ހަވާލާދީ "މިހާރު" ނޫހުން ރިޕޯޓްކޮށްފައިވާ ގޮތުގައި މިއަދު މެންދުރު ހިނގި މި މާރާމާރީގައި ޒަޚަމްވި ދެ ކުދިންނަށް ވެސް އެ ހޮސްޕިޓަލްގައި ފަރުވާދެމުންދާއިރު، އޭގެ ތެރެއިން އެއް ކުއްޖެއްގެ ހާލު ސީރިއަސް ކަމަށެވެ. އަދި އަނެއް ކުއްޖާ އަށް ވެސް ޑްރެސިން ރޫމްގައި ފަރުވާ ދެމުން އަންނަ ކަމަށް އެ ހޮސްޕިޓަލުން ބުނެއެވެ.
މީގެ އިތުރުން އެ ހޮސްޕިޓަލުން ބުނީ މި ހާދިސާގައި ސީރިއަސް ޒަޚަމްތަކެއް ލިބި އިމާޖެންސީ ރޫމްގައި ފަރުވާ ދެމުން އަންނަނީ ގދ. ރަތަފަންދޫ ކުއްޖަކަށް ކަމަށާއި، ޑްރެސިންގ ރޫމްގައި ފަރުވާ ދެމުން އަންނަނީ އައްޑޫ ސިޓީ އަށް ނިސްބަތްވާ ކުއްޖަކަށް ކަމަށެވެ.
މިއަދު ހިނގި މި މާރާމާރީ އާއި ގުޅިގެން ދެ މީހަކު ފުލުހުންގެ ބެލުމުގެ ދަށަށް ގެންގޮސްފައިވާއިރު، މިކަމާއި ބެހޭ އިތުރު އެއްވެސް ތަފްސީލެއް ފުލުހުން އަދި ހާމައެއް ނުކުރެއެވެ.