2018 ވަނަ އަހަރުގެ އޮކްޓޫބަރު، ނޮވެންބަރުގައި ބޭއްވި ކެމްބްރިޖް އޯލެވެލް އާއި އައިޖީސީއެސްއީ އަދި އެސްއެސްސީ އިމްތިޙާނުގެ ނަތީޖާ ދޫކުރަން ފަށައިފި އެވެ.
އެގޮތުން މިއަދު ހެނދުނުން ފެށިގެން ރާއްޖޭގެ ހުރިހާ ސްކޫލަކުން ދަނީ މިދިޔަ އަހަރުގެ ސާނަވީ އިމްތިހާނުގެ ނަތީޖާތައް ދޫކުރަމުންނެވެ.
ޑިޕާޓްމަންޓް އޮފް ޕަބްލިކް އެގްޒެމިނޭޝަން އިން ބުނީ މިދިޔަ އަހަރުގެ ކެމްބްރިޖް އޯލެވެލް އާއި އައިޖީސީއެސްއީ އަދި އެސްއެސްސީ އިމްތިޙާނުގެ ނަތީޖާ ސްލިޕް 2019 ޖަނަވަރީ 20 ވަނަ ދުވަހުން ފެށިގެން 2019 ފެބުރުވަރީ 06 ގެ ނިޔަލަށް އެ ޑިޕާޓްމަންޓުންނާއި ސެންޓަރުތަކުން ރަސްމީ ބަންދު ނޫން ކޮންމެ ދުވަހެއްގެ 08:30 ން 13:30 އަށް ދޫކުރާނެ ކަމަށެވެ.
އަދި އެ ޑިޕާޓްމަންޓް މެދުވެރިކޮށް އަމިއްލަ ގޮތުން އިމްތިޙާނުގައި ބައިވެރިވި ކެންޑިޑޭޓުންގެ ނަތީޖާ ދޫކުރާނީ ދިވެހިރައްޔިތެއްކަން އަންގައިދޭ ކާޑު ގެނައުމުން ކަމަށާއި، ބަދަލުގައި މީހަކު ފޮނުވާނަމަ، ކެންޑިޑޭޓުގެ އައި.ޑީ.ކާޑާއި ޙަވާލުވާ ފަރާތުގެ އައިޑީކާޑު ގެންނަންވާނެ ކަމަށްވެސް އެ ޑިޕާޓްމަންޓުން ބުނެއެވެ.
ނަތީޖާގައި އެއްވެސް މައްސަލައެއްވާނަމަ، 2019 ފެބުރުވަރީ 07 ވަނަ ދުވަހުގެ 12:00 ގެ ކުރިން އެކަން ލިއުމަކުން އެ ޑިޕާޓްމަންޓަށް ހުށައެޅުމުގެ ފުރުސަތު އޮންނާނެ އެވެ. އަދި ނަތީޖާ ރީޗެކްކުރުމަށް ބޭނުންވާ ކެންޑިޑޭޓުން، އެކަމަށް އެދޭ ފޯމު ފުރިހަމަ ކުރުމަށްފަހު 2019 ފެބުރުވަރީ 11 ވަނަ ދުވަހުގެ 12:00 ގެ ކުރިން ހުށަހެޅުމަށް ވެސް އެ ޑިޕާޓްމަންޓުން އެދެއެވެ.
މިދިޔަ އަހަރުގެ އޯލެވެލް އިމްތިޙާނުގައި 5،802 ދަރިވަރުން ބައިވެރިވި އެވެ.