ރައްޔިތުންގެ މަޖިލީހުގައި އެމްޑީޕީގެ ޓިކެޓު ހޯދުމަށް މުޅި ރާއްޖޭގައި މިއަދު ބޭއްވި ޕްރައިމަރީގައި ވޯޓުލުން ނިމިފައިވާ ވޯޓު ފޮށިތައް ގުނައި، ނަތީޖާ ނެރުމަށް އެމްޑީޕީން ތައްޔާރުވެއްޖެއެވެ.
ރާއްޖޭގެ އެކި ކަންކޮޅުތަކުގައި އެމްޑީޕީއަށް ރަޖިސްޓާވެފައި ތިބި 86،000 އަށް ވުރެ ގިނަ މެމްބަރުންނަށް ވޯޓުލުމުގެ ފުރުސަތު ދީފައިވާއިރު އާބާދީ ބޮޑު ސަރަހައްދުތަކުގައި 9:30 ވީއިރު ވެސް ވޯޓުލާ ނުނިމެއެވެ. އައްޑޫ ސިޓީގެ ހަތް ދާއިރާގެ ވޯޓުލުން އަދިވެސް ކުރިއަށްދާއިރު ހިތަދޫ ދެކުނާއި އުތުރުގެ ވޯޓު ފޮށިތައް ކައިރީ ވަރަށް ދިގު ކިޔޫއެއް ވަނީ ހަދާފައެވެ.
ބައެއް ވޯޓު ފޮށިތައް ވޯޓު ފަށަން ހަމަޖެހުނު މެންދުރު 14:30 ގައި ވޯޓުލާން ނުފެށޭތީ އެމްޑީޕީން ވަނީ 9:30 ވަންދެން ވޯޓުލުމުގެ ފުރުސަތު ދީފައެވެ. އަދި އެގަޑި ހަމަވުމުގެ ކުރިން ވޯޓުލާން ކިޔޫގައި މަޑުކުރާ އެންމެންނަށް ވޯޓުލުމުގެ ފުރުސަތު ދެވޭނެއެވެ.
ޕްރައިމަރީގެ އިންތިޒާމުތައް އެމްޑީޕީން ހަމަޖައްސާފައިވާ ގޮތާ މެދު ގިނަ ބަޔަކު ވަނީ ނުރުހުން ފާޅުކޮށް، ޕާޓީގެ ހިންގުންތެރިންނަށް ފާޑުކިޔާފައެވެ.