އަށާރަ ވަނަ ރައްޔިތުންގެ މަޖިލީހުގައި އައްޑޫ ސިޓީ ތަމްސީލު ކުރައްވަމުން ގެންދަވާ އެމްޑީޕީގެ ފަސް މެމްބަރުންގެ ތެރެއިން ހިތަދޫ މެދު ދާއިރާގެ މެމްބަރު އިބްރާހިމް މުހައްމަދު ދީދީ މިފަހަރުގެ ޕްރައިމަރީ އިން ނާކާމިޔާބުވެވަޑައިގެންފިއެވެ.
ޑީޑީ ބަލިކުރައްވައި ޓިކެޓު ކާމިޔާބުކޮށްފައިވަނީ ވަގުތީ ނަތީޖާތައް ދައްކާ ގޮތުން ސ. ހިތަދޫ އަރާއިރު، އަހުމަދު ރަޝީދު(ޗެކްމާކް) އެވެ. ނޫރާނީ ސްކޫލުގައި ބެހެއްޓުނު މެދު ދާއިރާގެ ވޯޓު ފޮށިން އިބްރާހިމްދީ އަށް ލިބިފައިވަނީ 401 ވޯޓެވެ. އަހުމަދު ރަޝީދު މި ފޮށިން 491 ވޯޓު ހޯދާފައިވާއިރު ދެން ވާދަކުރި ދެ ކެންޑިޑޭޓުން ކަމަށްވާ ޝަރީފަށް 29 ވޯޓު، އަލީ މުފީދަށް 36 ވޯޓު ލިބިފައިވެއެވެ.
މާލޭގައި ބެހެއްޓުނު މިދާއިރާގެ ފޮށިން އިބްރާހިމްދީ އަށް ލިބިފައިވަނީ 73 ވޯޓެވެ. އަހުމަދު ރަޝީދު 111 ވޯޓު ހޯދާފައިވާއިރު އަލީ މުފީދަށް ލިބުނީ 15 ވޯޓެވެ. އަދި ޝަރީފަށް މި ފޮށިން ލިބިފައިވަނީ އެންމެ 6 ވޯޓެވެ.
ވަގުތީ ނަތީޖާ ދައްކާ ގޮތުން އަހުމަދު ރަޝީދު މެދު ދާއިރާގެ ޕްރައިމަރީ ކާމިޔާބުކޮށްފައިވަނީ 602 ވޯޓު ހޯދައިގެންނެވެ. ޑީޑީއަށް ލިބިފައިވަނީ 474 ވޯޓެވެ. އަހުމަދު ރަޝީދަށް ވަނީ ޑީޑީއަށް ވުރެ 128 ވޯޓު އިތުރަށް ވޯޓު ލިބިފައެވެ.