އިއްޔެ ބޭއްވުނު އެމްޑީޕީގެ އެތެރޭގެ އިންތިޚާބުގައި ހިތަދޫ މެދު ދާއިރާގެ މަޖިލިސް ޓިކެޓު ކާމިޔާބުކުރެއްވި އަހުމަދު ރަޝީދަށް، އިންތިޚާބުގައި ތާއީދުކޮށް ވޯޓު ދެއްވުމަށް ނާކާމިޔާބުވެވަޑައިގެންނެވި މިހާރުވެސް ގޮނޑި ތަމްސީލުކުރައްވާ މެމްބަރު ބްރިގޭޑިއާ (ރޓޔޑ) އިބްރާހިމްދީދީ އިލްތިމާސް ކުރައްވައި ނަމޫނާ ދައްކަވައިފިއެވެ.
މެމްބަރު ޑީޑީ މިއަދު ހެނދުނު ކުރެއްވި ޓުވީޓެއްގައި ވިދާޅުވީ އެމަނިކުފާނަށް ވޯޓު ދެއްވި ހުރިހާ އެމްޑީޕީ މެމްބަރުންގެ ކިބައިން ވަރަށް އިޚުލާސްތެރިކަމާއެކު ކުރިއަށް އޮތް މަޖިލިސް އިންތިޚާބުގައި ދާއިރާގެ ޓިކެޓު ކާމިޔާބު ކުރެއްވި އަހުމަދު ރަޝީދަށް ވޯޓު ދެއްވުމަށް އެދިވަޑައިގަންނަވާ ކަމަށެވެ.
ޑީޑީ ވަނީ އަހުމަދު ރަޝީދު އިންތިޚާބު ކާމިޔާބު ކުރެވުނުކަން ޔަގީން ވުމުން، ޓުވިޓާގައި އަހުމަދު ރަޝީދަށް މަރުހަބާ ދަންނަވާފައެވެ. ދެބޭފުޅުންގެ ފަރާތުން ވާދަވެރި ކެމްޕޭނެއް ފާއިތުވެދިޔަ މަސް ދުވަސް ތެރޭ ފެނިގެން ގޮސްފައިވާއިރު އަހުމަދު ރަޝީދު އިންތިޚާބު ކާމިޔާބުކުރެއްވީ ޑީޑީއަށް ވުރެ 128 ވޯޓު އިތުރަށް ހޯއްދަވައިގެންނެވެ.
މިހާރު މަޖިލީހުގައި ތިއްބެވި އައްޑޫގެ ފަސް މެމްބަރުންގެ ތެރެއިން ޑީޑީގެ އިތުރުން ދެކުނު ދާއިރާގެ މެމްބަރ ނިޒާރަށް ވެސް ވަނީ ޕާޓީ ޓިކެޓު ގެއްލިފައެވެ. ނިޒާރު ބަލިކޮށް އިންތިޚާބު ކާމިޔާބުކުރީ އިބްރާހިމް ނާޒިލް އެވެ.