އަނިޔާވެރިންނާއެކު ބައިވެރިވެ މަސައްކަތް ކުރުމަކީ "ޗޮއިސް" އެއް ނޫން ކަމަށާއި މާޒީ ހަނދާން ނުނެތޭ ކަމަށް ތިނަދޫ ދެކުނު ދާއިރާގެ ޖޭޕީ މެމްބަރު އަބްދުﷲ އަހުމަދު(އަބުޅޯ) ވިދާޅުވެއްޖެއެވެ.
ޖޭޕީގެ ލީޑަރ ގާސިމް އިބްރާހިމް، ކުރިއަށް އޮތް މަޖިލިސް އިންތިޚާބުގައި ޕީޕީއެމާ އެކު ނިކުންނަން އުޅޭ އަޑުތައް ފެތުރިފައިވަނިކޮށް އަބުޅޯ މިއަދު ކުރެއްވި ޓުވީޓެއްގައި ވިދާޅުވީ "އެ ދުވަސް" ހަނދާނެއް ނުނެތޭ ކަމަށެވެ. ބެލެވޭ ގޮތުގައި އަބުޅޯ ފާހަގަކޮށްފައިވަނީ ޕީޕީއެމުން ނިކުމެވަޑައިގަތް 12 މެމްބަރުންނަށް އޭރުގެ ސަރުކާރުން ކުރިމަތިކުރުވި ފިއްތުންތަކުގެ ވާހަކައެވެ.
ޚުދު ގާސިމް އިބްރާޙިމް ވެސް ކުރީގެ ރައީސް ޔާމީންގެ ވެރިކަމުގައި ޖަލަށް ލެވި، ދަރިކަލުން އެތައް ދުވަހެއް ވަންދެން ޖަލުގައި ބަންދުކޮށް ވިޔަފާރިތަކަށް ދަތިކުރުންތައް ކުރިމަތިކުރުމުން ގާސިމް ވަނީ، އެކޮޅުކޮޅުން އެލުވާފައި ކާޅަށް ކޮށާ ކާންދިނަސް ޔާމީނާ އެއްކޮށް މަސައްކަތް ނުކުރައްވާނެ ކަމަށް ވިދާޅުވެފައެވެ.
ނަމަވެސް މިހާރު އެމަނިކުފާނު އަނެއްކާވެސް ޔާމީނާއެކު މަސައްކަތް ކުރައްވަން އުޅުއްވަނީ އެމްޑީޕީން ޖޭޕީ މަގުމަތިކޮށްލި ކަމަށް ވިދާޅުވެފައެވެ. ގާސިމް ވަނީ ކޯލިޝަންގެ އެއްބަސްވުމާއި އެމްޑީޕީން ޚިލާފުވުމުން އަހުދާ ހިލާފުވެފައިވާ ކަމަށް ތުހުމަތުކުރައްވާފައެވެ.