ގދ. ތިނަދޫ އިން ފުރައިގެން މާލެ ދަތުރުކުރި "ފްރެޝް" ނަމަކަށް ކިޔާ ދޯންޏެއް ޚަބަރެއް ނުވުމާއި ގުޅިގެން އެމްއެންޑީއެފް ކޯސްޓްގާޑުން ހޯދަމުން ދަނިކޮށް އެ ދޯނީގެ ޚަބަރެއް ވެއްޖެއެވެ.
އެމްއެންޑީއެފް އިން މަޢުލޫމާތު ދޭ ގޮތުގައި މި ދޯނީގެ ޚަބަރެއް ވެފައިވަނީ ރޭ 00:50 ހާއިރު އެ ދޯންޏާ ގުޅުމުން ކަމަށެވެ. އަދި މި ދޯންޏާ ގުޅުމާއެކު އެމްއެންޑީއެފް ސަދަން އޭރިއާ ކޯސްޓްގާޑް ސްކޮޑްރަންގެ ލޯންޗެއް ދޯނި އޮތް ސަރަޙައްދަށް ގޮސް ދޯންޏާ ބެހޭ މަޢުލޫމާތު ނަގާފައިވާ ކަމަށްވެސް އެމްއެންޑީއެފް އިން ބުނެއެވެ.
އެ ދޯންޏާއި ހަވާލާދީ "އެމްއެންޑީއެފް" އިން ރިޕޯޓްކުރާ ގޮތުގައި ދޯންޏާ ނުގުޅި ގޮސްފައިވަނީ އިންޖީނު ހުއްޓުމުގެ ސަބަބުން ކަމަށާއި، ދޯނީގެ އިންޖީނަށް ދިމާވި މައްސަލަ ހައްލުކުރުމަށްފަހު ގާތްގަނޑަކަށް ފަތިހު 04:00 ހާއިރު ގދ. ތިނަދޫއަށް ވަދެފައިވާ ކަމަށެވެ.
މި ދޯނި ފެނުނު އިރު ދޯނީގައި ތިބި މީހުންގެ ހާލުވެސް ރަނގަޅެވެ. ދޯނީގައި ތިބީ ދިވެއްސަކާއި 2 ބިދޭސީންނެވެ.