ހުޅުމާލޭގައި ކުއްލި ގޮތަކަށް މިމަހުގެ 11 ވަނަ ދުވަހު މަރުވި އާއިޝަތު ވިޝާމާ، 27، ގެ މައްސަލާގައި ފުލުހުން ހައްޔަރުކުރި މީހާ ދޫކޮށްލައިފިއެވެ.
ފުލުހުން ހައްޔަރުކޮށްފައިވަނީ ވިޝާމާ މަރުވި ގޭގެ އަންހެނެއް ކަމަށް މީޑިޔާ ރިޕޯޓުތައް ބުނެއެވެ. އޭނާއަކީ އެގޭގެ ރަޖިސްޓްރީގައި އޮންނަ މީހެއް ކަމަށް މައުލޫމާތު ލިބިފައިވާއިރު އޭނާ މިނިވަން ކުރީ ބަންދާ މެދު ގޮތެއް ނިންމަން ހާޒިރުކުރުމުން ކްރިމިނަލް ކޯޓުންނެވެ.
ވިޝާމާ މަރުވި ގޮތް ސާފު ވެފައިނުވާއިރު ފުލުހުން ވަނީ ތަހުގީގު ހިނގަމުންދާ މައްސަލައަކަށް ވާތީ އެމައުލޫމާތު ހިފަހައްޓާފައެވެ. ނަމަވެސް އާއިލާއިން ވަނީ ވިޝާމާ މަރުވިއިރު އެކުގައި ތިބި ރައްޓެހިންނާ ހަވާލާދީ މަރުވުމުގެ ކުރިން ފިޓު ޖެހުނު ކަމަށް ބުނެފައެވެ.
ފިޓު ޖެހުމުން ރައްޓެހިން ވަނީ ވިޝާމާ ޓްރީޓޮޕް ހޮސްޕިޓަލަށް ގެންގޮސްފައެވެ. ހޮސްޕިޓަލުން ބުނެފައިވަނީ ގެނެވުނުއިރު ވެސް ވިޝާމާ މަރުވެފައިވާ ކަމަށެވެ.