މިސަރުކާރު ގެނައުމަށް ކުރީގެ ރައީސް ޔާމީންގެ ވެރިކަމުގެ ފަހު އަހަރުތެރޭ އުފެދުނު އިދިކޮޅު ކޯލިޝަނުން ހެދި އެއްބަސްވުމާ ޚިލާފުނުވުމަށް ރައީސް އިބްރާހިމް މުހައްމަދު ސޯލިހު އެމްޑީޕީ ގައުމީ މަޖިލިސް ކިބައިން އެދިވަޑައިގަތް ކަމަށާއި އެހެން ނަމަވެސް އެބޭފުޅުން ރައީސްގެ އެދިލެއްވުމަށް ފުރަގަސްދީފައިވާ ކަމަށް ޖުމުހޫރީ ޕާޓީގެ ލީޑަރ ގާސިމް އިބްރާހިމް ވިދާޅުވެއްޖެއެވެ.
ކޯލިޝަން ތިން ޕާޓީއާއި ރައީސް މައުމޫން އެކީގައި މަޖިލިސް އިންތިޚާބަށް ކެންޑިޑޭޓުން ނެރެން ކުރިން އެއްބަސްވި ނަމަވެސް އެމްޑީޕީން ވަނީ އެޕާޓީއަށް ލިބުނު ދާއިރާތައް މަދުކަމުން އެއްބަސްވުމާ ޚިލާފަށް ގައުމީ މަޖިލިސްގެ ވޯޓަކުން ހުރިހާ ދާއިރާއަކަށް ވާދަކުރަން ނިންމާފައެވެ.
އެކަމާ ހިތްޕުޅު ހަމަޖެހިވަޑައިނުގެން ގާސިމް ވަނީ މިފަހަކަށް އައިސް އެމްޑީޕީއާއި ރައީސް ނަޝީދަށް ވަރަށް ބޮޑަށް ފާޑުވިދާޅުވަމުންނެވެ. ރޭ އެމަނިކުފާނު ބައިވެރިވެވަޑައިގެންނެވި ޖަލްސާއެއްގައި ގާސިމް ވިދާޅުވީ، ސީދާ ރައީސުލް ޖުމުހޫރިއްޔާ، އެމްޑީޕީ ގައުމީ މަޖިލީހަށް ގޮސް އެކަން ބަދަލުކޮށްދޭން އެދުނަސް ނުކޮށްދޭނެއޭ ވިދާޅުވެފައިވާ ކަމަށެވެ.
"ރައީސް ސޯލިހު ވިދާޅުވި ތިމަންނައާއި މުހައްމަދު ނަޝީދު އެމްޑީޕީ ގައުމީ މަޖިލީހަށް ގޮސް މިގޮތް ބަދަލު ކުރަން އެދުނަސް ނުކޮށްދޭނެއޭ. އެހެންވެ އެހިސާބުން އަޅުގަނޑު ދެންނެވިން އެހެންތޯއޭ، ވަރަށް ދެރައޭ..،" ގާސިމް ވިދާޅުވިއެވެ.
ޖޭޕީއިން ވަނީ އެމްޑީޕީން ޕްރައިމަރީ ބޭއްވި ދުވަހު މަޖިލިސް އިންތިޚާބުގެ ކޯލިޝަނުން އެމްޑީޕީއާ ވަކިވެ އެހެން ޕާޓީތަކާއެކު ކޯލިޝަން ހެދުމަށް ތައްޔާރަށް އޮތް ކަމަށް ބުނެފައެވެ.
އަދި ކުރީގެ ރައީސް ޔާމީނާ އެކު ކުރިއަށް ދިއުމަށް ގާސިމް މަޝްވަރާ ކުރެއްވި ކަމަށް ވެސް އަޑު ފެތުރިފައިވެއެވެ.