ފިލްމު " ގުޑް ނިއުސް" މިއަހަރު ސެޕްޓެމްބަރު 6 ގައި ރިލީޒް ކުރަން ހަމަޖެހިފައިވާ ކަމަށް މިދިޔަ ހޯމަ ދުވަހު ކަރަން ޖޯހަރު އިއުލާން ކޮށްފިއެވެ.
މި ފިލްމު ކުރިން ނެރުމަށް ހަމަޖެހިފައިވީ ޖުލައި 19 ގައެވެ.
4 އަހަރަށްފަހު އަކްޝޭ ކުމާރު އަދި ކަރީނާ ކަޕޫރު އެކުގައި ފެނިގެންދާ މި ފިލްމުގައި އެ ދެތަރިންގެ އިތުރުން ދިލްޖީތު ދޯސަންޖް އަދި ކިއާރާ އަދްވާނީ ފެނިގެންދާނެއެވެ.
މިއީ އާއިލީ އަދި މަޖާ މަންޒަރުތަކެއް ފެނިގެންދާނެ ފިލްމެއްކަމަށް ފިލްމުގައި ހަރަކާތްތެރިވާ ފަރާތްތަކުން ވަނީ ބުނެފައެވެ. މި ފިލްމުގައި އަކްޝޭ އަދި ކަރީނާ ކުޅެނީ ކުއްޖަކު ހޯދުމަށް މަސައްކަތް ކުރާ ދެމަފިރިންގެ ރޯލެވެ.
އަދި ދިލްޖީތް އަދި ކިއާރާ ވެސް ފެނިގެންދާނީ ޕަންޖާބްގައި ދަރިޔަކު ހޯދުމަށް މަސައްކަތް ކުރަމުންދާ ދެމަފިރިންގެ ރޯލުންނެވެ.
ކަރީނާ އަދި އަކްޝޭ ވަނީ މީގެ ކުރިން ވެސް އެކުގައި ފިލްމުތަކެއް ކުޅެފައެވެ. އޭގެ ތެރޭގައި "އަޖްނަބީ"، "ބޭވަފާ"، "ތަޝަން"، "އެއިތުރާޒް"، " ކަމްބަކްތު އިޝްގް" ފަދަ ފިލްމުތައް ހިމެނެއެވެ.