ސްރީ ލަންކަން އެއާލައިންސްގެ އައްޑޫ ގަމަށް ކުރާ ދަތުރުތައް މެދުކަނޑާނުލައި ކުރިއަށް ގެންދިއުމަށް ނިންމާފައިވާ ކަމަށް އެއާލައިން ރާއްޖޭގައި އޮޕަރޭޓު ކުރަމުންދާ އޭސް އޭވިއޭޝަނުން ހާމަކޮށްފިއެވެ.
ވަރަށް ގިނަ ދަތިތަކާއެކު ދެ އަހަރުވަންދެން ދަތުރުތައް ކުރުމަށް ފަހު، އެއްބާރުލުމެއް ނުލިބޭތީ މިއަހަރުގެ އެޕްރީލް މަހުން ފެށިގެން އައްޑޫ ދަތުރުތައް ހުއްޓާލުމަށް އެއާލައިނުން ނިންމިއެވެ. ނަމަވެސް މިހާރު ސަރުކާރުގެ ކަމާ ބެހޭ އިދާރާތަކާއި މަޝްވަރާ ކުރުމަށް ފަހު ދަތުރުތައް ހުއްޓާނުލައި ކުރިއަށް ގެންދިއުމަށް އެއްބަސްވެފައިވާ ކަމަށް އޭސް އޭވިއޭޝަންގެ މެނޭޖިން ޑިރެކްޓަރ މުހައްމަދު ފިރާގު ވިދާޅުވިއެވެ.
ސްރީ ލަންކަން އެއާލައިންސްގެ އައްޑޫ ދަތުރުތައް ފަށާފައިވަނީ 2016 ވަނަ އަހަރުގެ ޑިސެމްބަރު މަހުގެ އެއްވަނަ ދުވަހުއެވެ. އޭސް އޭވިއޭޝަނުން ބުނެފައިވަނީ ދެ އަހަރު ވަންދެން އައްޑޫ ދަތުރުތައް ކުރަން ޖެހުނީ ދަތިތަކާއެކު ހައްލެއް ނުލިބި ކަމަށެވެ.
އެގޮތުން ދަތުރުތައް ފެށިއިރު ކަންކަން ކުރަން ރާވާފައިވާ ގޮތަށް ކަންކަން ގޮސްފައިނުވާ ކަމަށް ފިރާގު ވިދާޅުވިއެވެ. އޭނާ ވިދާޅުވީ ވަރަށް "ސިމްޕަލް" ކަންތައްތަކެއް ހައްލުކުރެވިއްޖެނަމަ ކާމިޔާބު ވެގެންދާނެ ކަމަށެވެ.
އައްޑޫ އިންޓަނޭޝަނަލް އެއާޕޯޓުގައި މިހާރު ސައުތް އެފްރިކަން އެއާލައިންސް ވެސް ޖައްސައެވެ. ކޮންމެ ހަފްތާއަކު ދެކުނު އެފްރިކާގެ ދަތުރުތައް ކުރަމުން އަންނައިރު އޭގެއިން ދިވެހި އިގްތިސޯދު ފުޅާ ކުރުމަށް ފުރުސަތު ލިބިގެން ދާނެ ކަމަށް އިގްތިސޯދީ މާޙިރުން ބުނެފައިވެއެވެ.