ކޯލިޝަންގެ ބޭފުޅުން ދައްކަވާ ޖަޒީރާ ރާއްޖެއަކީ ކޮން ޖަޒީރާ ރާއްޖެ އެއްތޯ ކޯލިޝަންގައި ހިމެނޭ ޖުމުހޫރީ ޕާޓީގެ ލީޑަރ ގާސިމް އިބްރާހިމް ސުވާލު އުފައްދަވައިފިއެވެ.
އެމްޑީޕީއަށް އަނެއްކާވެސް ވަރަށް ބޮޑަށް ފާޑުވިދާޅުވަމުން ގާސިމް އިބްރާހިމް ވަނީ އެބޭފުޅުން ދައްކަވާ ޖަޒީރާ ރާއްޖެ އަކީ ކޮން ޖަޒީރާ ރާއްޖެއެއްކަން ބުނެދެއްވާން ޖެހޭ ކަމަށެވެ. ކުރިން ވިދާޅުވި "އަނެއް ދިވެހިރާއްޖެ" ތޯ އެއީ ގާސިމް ސުވާލު އުފެއްދެވިއެވެ.
ކުރީގެ ރައީސް މުހައްމަދު ނަޝީދުގެ ކުރީގެ ކެމްޕޭނު ޝިއާރަކަށް ފާޑުވިދާޅުވަމުން ގާސިމް ވިދާޅުވީ އެ ވިދާޅުވާ އަނެއް ދިވެހި ރާއްޖެއަކީ މީގެ އެތައް އަހަރެއް ކުރިން ރާއްޖޭގައި ދިރިއުޅުނު ބުދިސްޓުންގެ ރާއްޖެ ތޯ ސުވާލު އުފައްދަވާފައެވެ.
"މިތާ ދީނީ ހަނގުރާމައެއް ފައްޓަންތޯ މިއުޅެނީ؟ މީކޮންކަމެއްތޯ؟ ބަލަ އަނެއް ދިވެހިރާއްޖެ އެއީ ކޮންތާކު އޮތް ދިވެހި ރާއްޖެއެއްތޯ؟ މީގެ އެއް ހާސް، ދެހާސް އަހަރުކުރިން މިތާ ބުދިސްޓުން އުޅުނީމަ އެވާހަކަތޯ މި ދައްކަނީ، ރީތިކޮށް ބުނެލައްވަންވީ ނޫންތޯ؟ ދެން މިހާރު ޖަޒީރާ ރާއްޖެ، ކޮން ޖަޒރާ ރާއްޖެއެއްތޯ؟" ގާސިމް ފާޑުވިދާޅުވިއެވެ.
ކުރީގެ ރައީސް ޔާމީންގެ ވެރިކަން ނިންމުމަށް ރިޔާސީ އިންތިޚާބުގައި ކޯލިޝަން ހަދައިގެން ކޯލިޝަންގެ ހުރިހާ ބައިވެރިން ކެމްޕޭނު ކުރައްވަމުން ގެންދެވީ ޖަޒީރާ ރާއްޖެއަކަށް ދިވެހިން ވާސިލުކޮށްދެއްވާނެ ކަމުގެ ވައުދުގައެވެ.
ގާސިމް އިބްރާހިމް އޭރު ރާއްޖެއިން ބޭރަށް އަރުވާލެވިގެން ހުންނެވި ނަމަވެސް އެމަނިކުފާނުގެ ފަރާތްޕުޅުން ޖޭޕީގެ ބައިވެރިން ކެމްޕޭނުގައި ބައިވެރިވެވަޑައިގެން ދެއްކެވީ ވެސް ޖަޒީރާ ރާއްޖޭގެ ވާހަކައެވެ.
ކޯލިޝަނުގައި ހިމެނޭ އެމްޑީޕީއާއި ގާސިމާ ދެމެދު މައްސަލަ ޖެހި ކޯލިޝަނުން ވަކިވެވަޑައިގަތުމަށް އުޅޭ ޚަބަރު ގަދަވެފައިވަނިކޮށް ގާސިމް ވަނީ ޔާމީންގެ އާ ޕާޓީ ޕީއެންސީ އުފައްދަން މަޖިލިސް 24 ގަޑިއިރު ހުޅުވައިގެން މަސައްކަތް ކުރަން ޖެހުނަސް އެކަން ވެސް ކުރާނެ ކަމަށް ރޭ ވިދާޅުވެފައެވެ.
އިލެކްޝަންސް ކޮމިޝަނުގެ މެމްބަރުން ޒާތީވެ ޕީއެންސީ ރަޖިސްޓާ ކުރުމުގެ ހުއްދަ ނުދޭ ކަމަށް ވިދާޅުވެ ގާސިމް ވަނީ އެކަން ނުކުރެވޭނެ ކަމަށް ހަރު އަޑުން ގޮވާލާފައެވެ. އަދި މަޖިލީހުގެ ރައީސްގެ ހައިސިއްޔަތުން 24 ގަޑިއިރު މަޖިލިސް ހުޅުވައިގެން އެކަން ކުރަން ޖެހުނަސް ޕާޓީ ރަޖިސްޓްރީ ކޮށްދޭނެ ކަމަށް ގާސިމް ވިދާޅުވިއެވެ.
"މިބޭފުޅުން މިތަނަށް ހުށައަޅައިފިނަމަ 24 ގަޑިއިރު ރައްޔިތުންގެ މަޖިލިސް ހުޅުވައިގެންވެސް އެކަން ނިންމާނަން. އެއީ އަޅުގަނޑުގެ މަސްއޫލިއްޔަތެއް އަޅުގަނޑަށް އެކަން ކުރެވޭނެ، އެކަން ކުރާނަން. މިއީ އިންޒާރު ދިނުމެއް ނޫން އެކަމަކު ޒާތީ ގޮތުން އެއްވެސް މުއައްސަސާއަކަށް ވަކި މީހަކާ ޖައްސާލައިގެން އެކަން ނުކުރެވޭނެ،" އީސީ މެމްބަރުން ޕީއެންސީ ރަޖިސްޓާ ނުކޮށް ދޭތީ ޕީޕީއެމް މެމްބަރުންގެ ކަންބޮޑުވުންތަކަށް ޖަވާބު ދެއްވަމުން ގާސިމް ވިދާޅުވިއެވެ.