ސަރުކާރު ނުވެއްޓޭނެ ކަމަށާއި އަދި ކޯލިޝަން ނުރޫޅޭނެ ކަމަށް ކުރީގެ ރައީސް އަދި އެންމެ ބޮޑު ސިޔާސީ ޕާޓީ ކަމަށްވާ އެމްޑީޕީގެ ލީޑަރު މުހައްމަދު ނަޝީދު ވިދާޅުވެއްޖެއެވެ.
އެ މަނިކުފާނު މިހެން ވިދާޅުވެފައިވަނީ މިއަދު ހެނދުނު "ރާއްޖެޓީވީ" އިން ގެނެސްދިން "ފަށާއިރު" ޕްރޮގްރާމްގައި ރައީސް އިބްރާހިމް މުހައްމަދު ސޯލިހްގެ ކޯލިޝަން ސަރުކާރު ވެއްޓިދާނެތޯ ކުރި ސުވާލަކަށް ޖަވާބު ދެއްވަމުންނެވެ.
ނަޝީދު ވިދާޅުވީ ސަރުކާރު އެބަ ހިނގާ ކަމަށެވެ. އަދި ވުޒާރާތައް ވެސް ހިނގާ ކަމަށެވެ. "އެބާވަތުގެ ކަމެއް ނުހިނގާ، ސަރުކާރު ނުވެއްޓޭނެ. ކޯލިޝަން ނުރޫޅޭނެ،" ނަޝީދު ވިދާޅުވިއެވެ. ކޯލިޝަން އޮތީ ބަދަހިކޮށް ކަމަށް ނަޝީދު ވިދާޅުވިއެވެ.
މިހެން ނަޝީދު ވިދާޅުވިއިރު ކޯލިޝަންގައި ހިމެނޭ ބޮޑު ދެ ޕާޓީ ކަމަށްވާ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އާއި ޖުމްހޫރީ ޕާޓީ (ޖޭޕީ) އާއި ދެމެދު ވަނީ ކަންބޮޑުވުންތަކެއް އުފެދިފައެވެ. ޖޭޕީ އާއި އެމްޑީޕީ އާއި ދެމެދު ކަންބޮޑުވުންތަކެއް އުފެދިފައިވަނީ 19 ވަނަ ރައްޔިތުންގެ މަޖިލީހުގެ 86 ދާއިރާއަށް އެމްޑީޕީން ވާދަކުރުމަށް ނިންމުމާއި ގުޅިގެންނެވެ.
ސަރުކާރާއެކު ވެފައިވާ ކޯލިޝަން އެއްބަސްވުމަކީ އެމްޑީޕީން ހެޔޮ ހިތުން ޤަބޫލުކޮށްފައިވާ އެއްބަސްވުމެއް ކަމަށް ނަޝީދު ވިދާޅުވިއެވެ. ނަމަވެސް ރައްޔިތުންގެ މަޖިލީހުގައި 86 ދާއިރާއަށް ވާދަކުރުމަކީ ކޯލިޝަން އެއްބަސްވުމުގައި ހިމެނޭ ކަމެއް ނޫން ކަމަށް އެމަނިކުފާނު ވިދާޅުވި އެވެ.
ރައްޔިތުންގެ މަޖިލީހުގެ 86 ދާއިރާއަށް އެމްޑީޕީން ވާދަކުރުމަށް ނިންމުމާއި ގުޅިގެން ކޯލިޝަންގައި ހިމެނޭ ހަތަރު ޕާޓީގެ ތެރެއިން ޖޭޕީން ދަނީ އެކަމާއި ދެކޮޅަށް އެމްޑީޕީއަށް ބަހުގެ ހޫނު ހަމަލާތައް ދެމުންނެވެ. ޖޭޕީން ބުނެފައިވަނީ ރައްޔިތުންގެ މަޖިލީހުގެ އިންތިޚާބުގައި ވާދަކުރުމަށް ޖޭޕީ ފިޔަވައި އެހެން ޕާޓީތަކާއި އެކު ކޯލިޝަން ހަދާނެ ކަމަށެވެ. އެގޮތުން ދާދި ފަހުން ގާސިމް ވަނީ ޕީއެންސީގެ އިސްފަރާތްތަކާއި ބައްދަލު ވެސް ކުރައްވާފައެވެ.
ޖުމްހޫރީ ޕާޓީގެ ލީޑަރުގެ އަމަލުތައް ހުރިގޮތުން ގިނަ ބައެއްގެ ފާޑުކިޔުންތައް އެމަނިކުފާނަށް ވަނީ އަމާޒުވެފައެވެ.