އެކާވީސް ވަނަ ގަރުނުގެ މިޑިޖިޓަލަ ޒަމާނުގައި، މީހުންގެ ލޯތަށް އިލެކްޓްރޯނިކް ޑިވައިސްތަކަށް ތަތްލަވާފައި ތިބި ތިބުމުގެ ތެރެއިން ކަރުދާސް ފޮތްތަކުގެ މަތިން ގިނަ މީހުން މިހާރު ތިބީ ހަނދާންނެތިފައެވެ. ފޮތް ހުޅުވާލާމުން އެދުވާ ކަރުދާހާއި ދެލީގެ ވަހުން، އެއް ޞަފްހާ ނިމިގެން އަނެއް ޞަފްހާއަށް ދާން ގަނޑު ހިއްލާލާއިރު އެކިޔާ އަޑާ، ކިޔާ ނިމުނު ހިސާބު ފާހަގަކޮށްލަން ފާހަގަކޮޅެއް އަޅާލުންފަދަ ކަންކަމަކީ މިހާރު ވަރަށް މަދުން ނޫނީ ނުފެންނަ ކަންކަމެވެ. އާންމުކޮށް ފޮތްކިޔުންވެސް ދަނީ އުވިދަމުންނެވެ.
ފޮތްކިޔުމުގެ އާދަ އުވިދިޔަ ނުދިނުމަށްޓަކައި އެކިފަރާތްތަކުންދަނީ ތަފާތު އެކިއެކި މަސައްކަތްތަކެއް ކުރަމުންނެވެ. މިގޮތުން އައްޑޫގެ ފޮތްކިޔުމަށް ޝައުޤުވެރިކަންހުންނަ ފަރާތްތަކުންވެސް ވަނީ މިއަޒުމުގައި އައްޑޫގައި ކޮމިއުނިޓީ ފޮތް ހަރުގަނޑެއް ބަހައްޓާފައެވެ. "ފޮއް ކީސާ"ގެ ނަމުގައި ބެހެއްޓުނު މި ފޮތްހަރުގަނޑު ބެހެއްޓިފައި ވަނީ އައްޑޫ ސިޓީ ހިތަދޫ ނޫރާނީ ސްކޫލް ކުރިމަތީގައެވެ. ފޮއްކީސާ ޓީމުން މައުލޫމާތު ދިންގޮތުގައި ފޮތްކަޔުމަކީ އެެންމެންވެސް ކުރާހިތުން ކުރާކަމަކަށްވުމަށް އެޓީމުން އެދޭކަމަށާއި، މި ފޮތް ހަރުގަނޑު ކުލާސްރޫމްތަކާއި ލައިބްރަރީތަކުގެ ހަތަރު ފާރުން ބޭރުގައި ބަހައްޓުމަށް ނިންމީ އެހެންވެ ކަމަށެވެ. އެޓީމުން އިތުރަށް މައުލޫމާތު ދިންގޮތުގައި އެޓީމުން މިފޮތް ހަރުގަނޑު ބެހެއްޓުމުގެ އަނެއް މަގުޞަދަކީ ފޮތްކިޔުމުގެ ތެރެއިން މުޖުތަމަޢުގެ ތެރޭގައި އެކުވެރިކަމާއި އެއްބައިވަންތަކަން އާލާކުރުމެވެ.
ހަރުގަނޑުގައި ހުންނަ ފޮތްތައް ކިޔާލަން ގެއަށް ގެންދެވޭނެ ނިޒާމެއް އަދި ހަމަޖެހިފައި ނުވިނަމަވެސް ފޮއް ކީސާ ޓީމުން ބުނާގޮތުގައި ވަރަށް އަވަހަށް އެކަންތައް ހަމަޖެހިގެންދާނެއެވެ. އަދި ފޮއް ކީސާއަށް ފޮތް ހަދިޔާކުރަން ބޭނުންވާ ފަރާތްތަކަށް އެފުރުސަތު ހުޅުވާލާފައިވާކަަމަށްވެސް އެޓީމުންވަނީ ބުނެފައެވެ. މިގޮތުން ޕެބްލްސް އިން، ނިއޮން ބޭކަރީ އަދި ހިތަދޫ ތުރީ އެސް ސުޕަމާޓުގައި ފޮއް ކީސާގެ ފޮތް ހަދިޔާކުރާ ފޮށިގަނޑެއް ބެހެއްޓިފައިވާނެއެވެ.
މިހަރުގަނޑު ބެހެއްޓުމުގައި ވަރަށް ގިނަ ފަރާތްތަކެެއްގެ އެހީވެސް ލިބުނުކަމަަށް އެޓީމުން ބުނެފައިވެއެވެ. އެގޮތުން ފޮއް ކީސާ ހުޅުވުނު ދުވަހު އައިލެންޑް ބަޒާރުން ޕްލާސްޓިކް ބޭނުންކުރުން ހުއްޓުވުމުގެ ގޮތުންވަނީ ދަގަނޑު ހޮޅިތަކެއްވެސް އެދުވަހު ބޭނުންކުރުމަށް ހަދިޔާކޮށްފައެވެ. އަދި ޕެބްލްސްއިން، އީވް، ކޮންޓްެރޯލް ޕީ، ފޮތް ހަދިޔާކުރި އެންމެހާ ފަރާތްތައް އަދި ބައެއް އާންމުންގެ ފަރާތުން މި ހަރުގަނޑު ބެހެއްޓުމުގައި އެކިގޮތްގޮތުން ވެދިން އެހީ ވަނީ ފާހަގަކޮށްފައެވެ.
ފޮއް ކީސާ ޓީމުގެ އުންމީދަކީ މިފަދަ އިތުރު ހަރުގަނޑުތައް އައްޑޫގެ އެކި ސަރަހައްދު ތަކުގައި ބެހެއްޓުމެވެ. އަދި ފޮއް ކީސާ ކުރިއަށް ގެންދިޔުމުގައި މުޖުތަމަޢުގެ އެކިއެކި ފަރާތްތަކުގެ އެހީވެސް ލިބުމެވެ. އެގޮތުން އެޓީމުންވަނީ ފޮއް ކީސާ ކުރިއަށް ގެންދިޔުމަށް އެހީތެރިވުމުގެ ވޮތުން ވޮލަންޓިއަރ ކުރަން ބޭނުންވާ ފަރާތްތަކަށް އެފުރުސަތު ހުޅުވާލާފައެވެ. އެގޮތުން ފޮއް ކީސާގެ ފޭސްބުކް ޕޭޖް އަދި އިންސްޓަގްރާމް އެކައުންޓަށް މެސެޖުކޮށްގެން ވޮލަންޓިއަރ ކުރެވޭނޭއެވެ.
ފޮއް ކީސާގެ މިހަރުގަނޑަކީ ބަހައްޓާފައިވަނީ އެންމެނަށް ހުޅުވާލައިގެން، އެންމެންގެ އެއްޗެއްގެ ގޮތުގައެވެ. އެހެންކަމުން އަހަރެމެން އެންމެން ވެގެން ފޮއް ކީސާ ދެމެހެއްޓެނިވިގޮތަކަށް ކުރިއަށް ގެންދިޔުމަށް މަސައްކަތްކުރަމާތޯއެވެ؟