ރާއްޖޭގެ ރައީސްކަން ކޮށްފައިވާ ފަރާތްތަކަށް މަޖިލީހުގެ މެމްބަރުކަމަށް ކުރިމަތިނުލެވޭ ގޮތަށް އިސްލާހު ހުށައަޅައިފިއެވެ.
މި އިސްލާހު ހުށައަޅައި ރައްޔިތުންގެ މަޖިލީހަށް ކުރިމަތިލެވޭ މެމްބަރުންގެ ޝަރުތުތަކަށް ކުރީގެ ރައީސަކަށް ނުވުން އިތުރުކުރަން ހުށައެޅީ ދިއްދޫ ދާއިރާގެ މެމްބަރު އަބްދުއްލަތީފްއެވެ. އަބްދުއް ލަޠީފުވަނީ ގާނޫނު އަސާސީގެ 73 ވަނަ މާއްދާގެ (ހ)އަށް ނަންބަރެއް އިތުރުކުރުމަށް ހުށަހަޅާފައެވެ.
އޭނާ ވަނީ ކުރިންވެސް މި އިސްލާހު ހުށައަޅާނެ ކަން އިއުލާން ކޮށްފައެވެ. އަދި ޖޭޕީން ވަނީ އިސްލާހު ނެގުމަށް ލަތީފަށް އަންގާފައެވެ.
އިންތިޚާބުތަކާ ބެހޭ ގާނޫނު އިސްލާހު ކުރެއްވުމަށް ލަތީފް ހުށައަޅާފައިވަނީ ގާނޫނު އަސާސީގެ 73 ވަނަ މާއްދާގެ (ހ) އަށް ނަމްބަރެއް އިތުރު ކުރުމަށެވެ.
ރާއްޖޭގެ ގާނޫނީ މާހިރުން ވަނީ ގާނޫނު އަސާސީގައި ރައްޔިތުންގެ މަޖިލިސް މެމްބަރަކަށް ވުމަށް ހަމަވާން ޖެހޭ ޝަރުތުތައް ބަޔާންވެފައިވާއިރު އެއަށް ބަދަލު ގެނައުމަށް އުނި އުތުރު ގެނައުމަކީ ގާނޫނު އަސާސީއާ ފުށު އަރާ ކަމެއް ކަމަށާއި އެއިސްލާހު މަޖިލީހަށް ބަލައިނުގަނެވޭނެ ކަމަށް ބުނެ ކަންބޮޑުވުން ފާޅުކޮށްފައެވެ.
މިމައްސަލާގައި އެމްޑީޕީން ވަނީ ލަތީފުގެ މި އިސްލާހަކީ ސީދާ އެޕާޓީގެ ރައީސް މުހައްމަދު ނަޝީދަށް އަމާޒުކޮށް ހުށައެޅި އިސްލާހެއް ކަމަށް ބުނެ ކަންބޮޑުވުން ފާޅުކޮށްފައެވެ. ނަޝީދު އިންތިޚާބުގައި ވާދަކުރާނެކަން އިއުލާންކޮށް ކެމްޕޭނު ފެށި ފަހުން މިފަދަ އިސްލާހެއް ހުށައެޅުމުން ވެސް އެއީ ސީދާ ނަޝީދަށް އަމާޒުކޮށްގެން ހުށައެޅި އިސްލާހެއް ކަމަށާއި އެކަން ނުކުރެވޭނެ ކަމަށް އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި ޕާޓީގެ ޗެއާޕާސަން ހަސަން ލަތީފް ވިދާޅުވިއެވެ.
ލަތީފް ވިދާޅުވީ، އެ އިސްލާހު ހުށައެޅީ ރާއްޖޭގެ ރައީސްކަން ކުރައްވާފައިވާ ފަރާތްތަކަށް ވަރަށް ބޮޑު އިނާޔަތްތަކެއް ދެވިފައިވާހިނދު، އެބޭފުޅުން ރައްޔިތުންގެ މަޖިލީހުގެ މެމްބަރު ކަމަށް އައުމަކީ ކަރާމާތަށް ލިބޭ އުނިކަމެއް ކަމުގައި ދެކޭތީ ކަމަށެވެ.