ސްކޫލް ކުދިންނަށް ހެނދުނުގެ ނާސްތާ ދިނުމަށް ހިންގާ ޕްރޮގްރާމާ ބެހޭ ގޮތުން ސައްޙަ ނޫން މަޢުލޫމާތު ނުފެތުރުމަށް އެޑިއުކޭޝަން މިނިސްޓްރީ އިން އަންގައިފި އެވެ.
އެ މިނިސްޓްރީ އިން މިއަދު ނެރުނު ނޫސްބަޔާނެއްގައި ބުނެފައި ވަނީ ނާސްތާ ޕްރޮގްރާމް ސްކޫލްތަކުގައި ކުރިއަށް ގެންދެވެނީ އެކަމަށްޓަކައި އެކުލަވާލާފައިވާ އުސޫލެއްގެ ތެރެއިން ކަމަށާއި، އެ އުސޫލުގައި ދަރިވަރުންނަށް ފޯރުކޮށްދެވޭ ކާބޯތަކެތި ހުންނަން ޖެހޭ ގޮތާއި، އެ ތަކެތީގެ ތާޒާކަން ބަލާނެގޮތްފަދަ މުހިންމު ކަންތައްތައް ކުރަންވީ ގޮތުގެ އިތުރުން ކާބޯތަކެތި ތައްޔާރު ކުރެވޭ ގޮތުގެ ބަޔާނެއް، އެތަކެތި ތައްޔާރުކުރާ ފަރާތުން ކޮންމެ ދުވަހަކު ސްކޫލަށް ހުށަހަޅަންޖެހޭނެ ކަމަށް އެ އުސޫލުގައި ބަޔާންކޮށްފައިވާނެ ކަމަށެވެ. އަދި ހަމަ އެހެންމެ ދަރިވަރުންނަށް ފޯރުކޮށްދެވޭ ކާބޯތަކެތީގެ ތާޒާކަން، ދަރިވަރުން ބޭނުންކުރުމުގެ ކުރިން ސްކޫލްގެ ފަރާތުން ބަލާނެ ގޮތްތައް ވެސް އުސޫލުގައި ބަޔާންކޮށްފައިވާނެ ކަމަށް މިނިސްޓްރީ އިން ބުނެއެވެ.
"ސްކޫލް ކުދިންނަށް ހެނދުނުގެ ނާސްތާ ދިނުމުގެ ޕައިލެޓް ޕްރޮގްރާމް އަކީ ދަރިވަރުން ދުޅަހެޔޮ ސިއްޙަތެއްގައި ބޭތިއްބުމަށާއި، ރަނގަޅު ކާނާ ކެއުމަށާއި، ކެއުމުގެ އާންމު އުސޫލްތައް އަށަގެނެވުންފަދަ ހެދިބޮޑުވަމުން އަންނަ ދަރިވަރުންގެ ލާބައާއި މަންފާއަށް ހިންގޭ މުހިންމު ޕްރޮގްރާމެކެވެ. އެހެންކަމުން، މި ޕްރޮގްރާމްގެ ފެންވަރު ހިފެހެއްޓުމަށް، ކާބޯތަކެތި ތައްޔާރުކުރާ ފަރާތްތަކުންނާއި، ސްކޫލްތަކުންނާއި މި މިނިސްޓްރީގެ ފަރާތުންވެސް ޚާއްސަ މަސައްކަތްތަކެއް ކުރަމުން ގެންދެވެއެވެ."، އެ ބަޔާނުގައި ވެއެވެ.
އެހެންކަމުން ނާސްތާ ޕްރޮގްރާމާއި ގުޅުވައިގެން މީސްމީޑިއާގައި ޚަބަރު ފަތުރާ ބައެއް ވަސީލަތްތައް މެދުވެރިކޮށް ތަފާތު ފަރާތްތަކުން ސައްޙަ ނޫން މަޢުލޫމާތު ފަތުރަމުންދާތީ ކަންބޮޑުވާ ކަމަށްވެސް އެ މިނިސްޓްރީ އިން ބުނެއެވެ. އަދި މިގޮތަށް ތަފާތު ސްކޫލްތަކުގެ ނަން ބޭނުންކޮށްގެން ފަތުރާފައިވާ ޚަބަރުތައް، އެ މިނިސްޓްރީގެ ފަރާތުން ބެލި ބެލުމުން އެފަދަ އެއްވެސް ޙާދިސާއެއް ހިނގާފައި ނުވާކަން ފާހަގަވެފައިވާ ކަމަށްވެސް އެ ބަޔާނުގައި ބުނެފައި ވެއެވެ.
"ސްކޫލް ކުދިންނަށް ހެނދުނުގެ ނާސްތާ ދިނުމުގެ ޕައިލެޓް ޕްރޮގްރާމް ކާމިޔާބުކަމާއެކު ކުރިއަށް ގެންދިއުމުގައި، މި ޕްރޮގްރާމްގެ ދަށުން ސްކޫލްތަކުގައި ޚިދުމަތްދޭ ފަރާތްތަކާއި، ސްކޫލްތަކުގެ ވެރިންނާއި މުވައްޒަފުންނާއި ބެލެނިވެރިން ކުރައްވަމުން ގެންދަވާ މަސައްކަތް ނުހަނު އިޚްލާސްތެރިކަމާއެކު ފާހަގަކޮށް، ޝުކުރު ދަންނަވަމެވެ. އަދި މި ޕްރޮގްރާމަށް ދަރިވަރުންގެ ފަރާތުން ލިބެމުންދާ ތަރުޙީބުވެސް ފާހަގަކުރަމެވެ."، އެ ބަޔާނުގައި ވެއެވެ.
އެޑިއުކޭޝަން މިނިސްޓްރީ އިން ބުނީ ނާސްތާ ޕްރޮގްރާމާއި ގުޅޭ ގޮތުން ޚަބަރު ފަތުރާ ވަސީލަތްތަކުން ނުވަތަ އެނޫން ފަރާތްތަކުންވެސް ބޭނުންވާ މަޢުލޫމާތު އެއްވެސް ހިފެހެއްޓުމެއް ނެތި އެ މިނިސްޓްރީގެ ފަރާތުން ދޫކުރާނެ ކަމަށެވެ. އެހެންކަމުން، އެ ޕްރޮގްރާމާއި ގުޅުވައިގެން ދަރިވަރުންނާއި ބެލެނިވެރިންނާއި އާންމު ރައްޔިތުންގެ ހިތްތަކުގައި ނުތަނަވަސްކަން އުފެދޭ ގޮތަށް ސައްޙަ ނޫން މަޢުލޫމާތު ނުފެތުރުމަށް އެ މިނިސްޓްރީ އިން އަންގާފައެވެ.