ކުރީގެ ރައީސުންނަށް މަޖިލިސް އިންތިޚާބުގައި ވާދަނުކުރެވޭ ގޮތަށް އިސްލާހު ހުށައަޅައި ފާސްކުރިޔަސް، އެ އިސްލާހު ތަސްދީގު ނުކުރައްވާނެ ކަމަށް ރައީސުލް ޖުމުހޫރިއްޔާ އިބްރާހިމް މުހައްމަދު ސޯލިހް ވިދާޅުވެއްޖެއެވެ.
ރައީސް މިހެން ވިދާޅުވިއިރު ރާއްޖޭގެ ރައީސްކަން ކޮށްފައިވާ ފަރާތްތަކަށް މަޖިލީހުގެ މެމްބަރުކަމަށް ކުރިމަތިނުލެވޭ ގޮތަށް މަޖިލީހުގެ އިންތިހާބުތަކާ ބެހޭ ގާނޫނަށް ދިއްދޫ ދާއިރާގެ ޖުމްހޫރީ ޕާޓީގެ މެމްބަރު އަބްދުއްލަތީފް ވަނީ އިސްލާހެއް ހުށަހަޅުއްވާފައެވެ.
މިއަދު ރައީސް އޮފީހުގައި ބޭއްވި ޕްރެސް ކޮންފަރެންސެއްގައި ވާހަކަ ދައްކަވަމުން ރައީސް ސޯލިހު ވިދާޅުވީ އެފަދަ އިސްލާހެއް މަޖިލީހުން ފާސްކުރިޔަސް ތަސްދީގު ނުކުރައްވާނެ ކަމަށެވެ.
"އަޅުގަނޑު ތަސްދީގެއް ނުކުރާނަން. އެއްވެސް މީހެއްގެ ސިޔާސީ މަސައްކަތަކަށް ހުރަސް އެޅޭ އެއްވެސް އިސްލާހަކަށް، އެއްވެސް ކަމަކަށް އަޅުގަނޑު ތާއީދެއް ނުކުރާނަން" ރައީސް ވިދާޅުވިއެވެ.
މިފަދަ އިސްލާހެއް ހުށަހަޅާފައިވާއިރު އަންނަ އޭޕްރީލް މަހު ބާއްވާ ރައްޔިތުންގެ މަޖިލީހުގެ އިންތިހާބުގައި ވާދަކުރައްވާނެކަން ކުރީގެ ރައީސް މުހައްމަދު ނަޝީދު ވަނީ އިއުލާންކުރައްވާފައެވެ. ނަޝީދު ވާދަކުރައްވަން ނިންމަވާފައިވަނީ މައްޗަންގޯޅީ މެދު ދާއިރާ އަށެވެ.
މި އިސްލާހާ ގުޅިގެން ލަތީފް އަށް ބޮޑެތި ފާޑުކިޔުންތަކެއް އަމާޒުވެފައިވާއިރު، އެ އިސްލާހު އަނބުރާ ނެގުމަށް ޖުމްހޫރީ ޕާޓީން ވެސް ވަނީ ލަތީފަށް އަންގާފައެވެ. ނަމަވެސް އަދި މިހާތަނަށް އޭނާ އިސްލާހު އަނބުރާ ނަގާފައެއް ނުވެއެވެ.
ލަތީފް ވިދާޅުވީ، އެ އިސްލާހު ހުށައެޅީ ރާއްޖޭގެ ރައީސްކަން ކުރައްވާފައިވާ ފަރާތްތަކަށް ވަރަށް ބޮޑު އިނާޔަތްތަކެއް ދެވިފައިވާހިނދު، އެބޭފުޅުން ރައްޔިތުންގެ މަޖިލީހުގެ މެމްބަރު ކަމަށް އައުމަކީ ކަރާމާތަށް ލިބޭ އުނިކަމެއް ކަމުގައި ދެކޭތީ ކަމަށެވެ.