ސަލްމާން ޚާންގެ އެންމެ ފަހުގެ ފިލްމް ކަމުގައިވާ "ބާރަތު"ގެ ޓީޒާ ޓްރެއިލާ ދައްކާލައިފި އެވެ.
އަލީ އައްބާސް ޒަފަރު ޑައިރެކްޓްކޮށްފައިވާ މި ފިލްމުން ކެޓްރީނާ ކައިފް އާއި ދިޝާ ޕަޓާނީގެ އިތުރުން ނޯރާ ފަތޭހީ އަދި ސުނިލް ގްރޯވަރު ވެސް މުހިންމު ރޯލްތަކުން ފެނިގެންދާނެ އެވެ. މި ފިލްމްގެ ޓީޒާ ނެރެފައި ވަނީ އިންޑިއާގެ ޖުމްހޫރީ ދުވަހާއި ދިމާކޮށެވެ.
ސަލްމާން ވަނީ އޭނާގެ ރަސްމީ ޓްވިޓާ އެކައުންޓް މެދުވެރިކޮށް ފިލްމްގެ ޓީޒާ ފޭނުންނާއި ހިއްސާކޮށްފަ އެވެ.
މި ފިލްމްގައި ސަލްމާންގެ ފަސް ލުކް ފެނިގެންދާނެ އެވެ. އެގޮތުން ނޭވަލް އޮފިސަރަކާއި، ސްޓަންޓްމޭނަކާއި، ފަޔާފައިޓަރަކާއި މިސްޓްރީ މޭނެއްގެ އިތުރުން ސިއްރު ކެރެކްޓާއެއްގެ ރޯލުން ވެސް ސަލްމާން ފެނިގެންދާނެ އެވެ.
މި ފިލްމް ޕްރޮޑިއުސްކޮށްފައި ވަނީ ސަލްމާންގެ ޅިޔަނު، އަތުލް އަގްނީހޯތުރީ އެވެ. އަދި ފިލްމް ރިލީޒްކުރުމަށް ހަމަޖެހިފައި ވަނީ މި އަހަރުގެ ފިތުރު އީދާއި ގުޅުވައިގެން އަންނަ ޖޫން މަހުގެ ފަސްވަނަ ދުވަހު އެވެ.