މަސޫރީގައި ޝާހިދް ކަޕޫރްގެ ފިލްމް "ކަބީރް ސިންގް" ޝޫޓް ކުރަމުން ދަނިކޮށް މީހަކު މަރުވެއްޖެ އެވެ.
އެނގިފައިވާ ގޮތުގައި އެ މީހާ މަރުވެފައި ވަނީ ފިލްމް ޝޫޓް ކުރަމުން ދިޔަ ހޮޓެލްގައި ޖެނެރޭޓަރެއް މަރާމާތުކުރުމުގެ މަސައްކަތް ކުރަމުން ދަނިކޮށެވެ. ޖެނެރޭޓަރުގެ ފަންކާގައި އެ މީހާގެ ބޯ ޖެހި، ބޮޑެތި ޒަޚަމްތަކެއް އޭނާ އަށް ވަނީ ލިބިފައެވެ. އެ ހާދިސާ ހިނގުމާއެކު އޭނާ ވަނީ ދެހެރާދުންގެ ހޮސްޕިޓަލަށް ގެންގޮސްފަ އެވެ. ނަމަވެސް އެ ހޮސްޕިޓަލްގައި ފަރުވާ ދެމުން ދަނިކޮށް، ލިބުނު އަނިޔާތަކުގެ ސަބަބުން އޭނާ ވަނީ މަރުވެފަ އެވެ.
މަޢުލޫމާތު ލިބޭ ގޮތުގައި މަރުވެފައި ވަނީ އުމުރުން 35 އަހަރުގެ ރާމް ކުމާރް އެވެ. އޭނާ އަކީ މުޒައްފަރްނާގަރްގެ ކިނޯނީ އަވަށުގައި ދިރިއުޅޭ މީހެކެވެ.
ރާމް ކުމާރްގެ މަރުގެ ޚަބަރު އާއިލާ އާއި ހިއްސާކޮށްފައިވާއިރު، މިއަދު އޭނާގެ ޕޯސްޓް ޕޯޓަމް ހަދާނެ ކަމަށް ފުލުހުން ބުނެއެވެ.
މި ހާދިސާ އާއި ގުޅިގެން "ކަބީރް ސިންގް"ގެ ޝޫޓިންގ ވަނީ ވަގުތީ ގޮތުން ހުއްޓާލާފަ އެވެ.