ސިނަމާލެ ބްރިޖުން ފައިބައިގެން ވެލާނާ އިންޓަނޭޝަނަލް އެއާޕޯޓް (ވީއައިއޭ) އަށް ދިއުމަށް އޮންނަ މަގުގައި މިއަދު ހެނދުނު ހިނގި އެކްސިޑެންޓެއްގައި މީހަކަށް އަނިޔާވެއްޖެ އެވެ.
މޯލްޑިވިއަންގެ ވެހިކަލަކާއި އެއާޕޯޓް ސްޓާފަކު ދުއްވާފައި ދިޔަ ސައިކަލެއް ޖެހި މި އެކްސިޑެންޓް ހިނގާފައި ވަނީ މިއަދު ހެނދުނު 10:30 ހާއިރު ކަމަށް ފުލުހުންނާއި ހަވާލާދީ "އަވަސް" ނޫހުން ރިޕޯޓް ކުރެއެވެ.
އަދި މި އެކްސިޑެންޓްގައި ސައިކަލު ދުއްވަން އިން މީހާ އަށް އަނިޔާވެފައިވާ ކަމަށާއި، އޭނާ އަށް މިހާރު ހުޅުމާލެ ހޮސްޕިޓަލްގައި ފަރުވާ ދެމުން އަންނަ ކަމަށްވެސް މަޢުލޫމާތު ލިބެއެވެ.
އަދި އޭނާގެ ކަކުލު ހުޅު ޑިސްލޮކޭޓްވެފައިވާ ކަމަށާއި، އިތުރު ބޮޑެތި އަނިޔާއެއް ލިބިފައި ނުވާ ކަމަށް ހުޅުމާލެ ހޮސްޕިޓަލްގެ އޮފިޝަލަކު ވިދާޅުވެފައިވާ ކަމަށް "އަވަސް" ނޫހުން ރިޕޯޓް ކުރެއެވެ.
ސިނަމާލެ ބްރިޖު އާންމުންނަށް ހުޅުވާލި ފަހުން ބްރިޖުގައި ގިނަ އެކްސިޑެންޓްތަކެއް ހިނގައި، އެތައް ބަޔަކަށް ވަނީ އަނިޔާވެފަ އެވެ.