ޔޫތް މިނިސްޓަރ އަހުމަދު މަހްލޫފާއި ފުޓުބޯޅަ އިދާރާއާ ދެމެދު ނުރުހުންވެރިކަން އުފެދި އާންމުވެ، އެންމެފަހުން މަހްލޫފް ޓުވިޓާގައި އެފްއޭއެމްގެ ލީޑާޝިޕް ބަދަލުކުރުމާ ގުޅޭ އާންމު ޕޯލެއް ނަގައިފިއެވެ.
ގާތްގަނޑަކަށް 2،600 މީހުން ބައިވެރިވި މިޕޯލުން 91 އިންސައްތަ މީހުން ވަނީ، އެފްއޭއެމްގެ ލީޑާޝިޕް ބަދަލުކުރަން ތާއީދުކުރާ ކަމަށް ވޯޓު ދީފައެވެ.
މިނިސްޓަރު ކަމާއި މަހްލޫފް ހަވާލުވުމާއެކު އެފްއޭއެމްގެ ރައީސް ބައްސާމާ ދެބޭފުޅުންގެ ދެމެދުގައި ޚިޔާލު ތަފާތުވުންތައް އުފެދި އެއް ބޭފުޅަކު އަނެއް ބޭފުޅަކަށް ވަނީ އެކިފަހަރު މަތިން ފާޑުކިޔާފައެވެ.
މަހްލޫފުގެ ނިންމުންތަކަށް ފާޑުކިޔައި އެފްއޭއެމުން ވަނީ ކުލަބުތަކާ ގުޅިގެން އެފްއޭއެމްގެ މަސައްކަތަށް ހުރަސްއަޅާ ކަމަށް ތުހުމަތުކޮށް ފާޑުކިޔާފައެވެ.
އެފްއޭއެމުން މިފަހަކަށް އައިސް އެއިދާރާގެ އަސާސީ ގަވާއިދުގެ ބޭރުން އަމަލުކުރަމުން އަންނަ ކަމަށް ބުނެ މަހްލޫފް ވަނީ ސަރުކާރުގެ މާލީ އެހީތައް ކަނޑާލާނެ ކަމުގެ އިންޒާރުވެސް އެފްއޭއެމަށް ދީފައެވެ.
އެފްއޭއެމްގެ ލީޑަޝިޕް ބަދަލުކުރުމަށް ކުލަބުތަކުގެ މެޖޯރިޓީ ލިބި ސޮއިކޮށް ހުށައަޅައިފިނަމަ އެކްސްޓްރާ އޯޑިނަރީ ކޮންގްރެސްއެއް ބާއްވަން މަޖުބޫރު ވާނެއެވެ.
މަހްލޫފް ވަނީ އިއްޔެ ޓުވިޓާ މެދުވެރިކޮށް ކުލަބުތަކުން އެކަން ކޮށްފައިވާ ކަމުގެ މައުލޫމާތު ލިބިފައިވާ ކަމަށް ވިދާޅުވެފައެވެ.