ރައީސުލްޖުމްހޫރިއްޔާ އިބްރާހީމް މުޙައްމަދު ސޯލިހު އާއި އެމަނިކުފާނުގެ އަނބިކަނބަލުން ފަޒްނާ އަޙްމަދު މިއަދު ހެނދުނު އޮތް ޓީ.އެފް.ޖީ. 5 ކިލޯމީޓަރު ދުވުމުގައި ބައިވެރިވެވަޑައިގެންފިއެވެ.
އެމަނިކުފާނުގެ ދެކަނބަލުންގެ އަރިހުގައި ގިނަ އަދަދެއްގެ ދުވުންތެރިންވެސް މި ދުވުމުގެ ހަރަކާތުގައި ބައިވެރިވެވަޑައިގެންނެވިއެވެ. މި ހަރަކާތަކީ ޓީ.އެފް.ޖީ.ގެ ފަރާތުން އިންތިޒާމްކޮށްގެން ލ. ގަމުގައި ބޭއްވި ދުވުމުގެ ބޮޑު ހަރަކާތެކެވެ.
ރައީސް ސޯލިހު ވަނީ އިއްޔެ ޓީ.އެފް.ޖީ މެރަތަން ރަސްމީކޮށް ފަށްޓަވައިދެއްވައިފައެވެ. މި މެރަތަން ރައީސް ފަށްޓަވައިދެއްވީ ލ.އަތޮޅުގެ ބައެއް ރަށްރަށް މިހާރު ކުރައްވަމުންގެންދަވާ ދަތުރުފުޅުގައި އެ އަތޮޅު ގަމުގައި މިކަމަށްޓަކައި އިއްޔެ ހަވީރު ބޭއްވެވި ރަސްމިއްޔާތެއްގައެވެ.
މެރަތަން ފަށްޓަވައިދެއްވުމަށްފަހު ރައީސް ވަނީ ޒޯން ސްޓޭޑިއަމާއި ޔޫތު ސެންޓަރު ބައްލަވައިލައްވައިފައެވެ.
ރައީސް ސޯލިހު ހައްދުންމަތީގެ ބައެއް ރަށްރަށަށް ކުރައްވާ މި ދަތުރުފުޅުގައި ލ. އަތޮޅުގެ ބައެއް ކައުންސިލްތަކާއި ބައްދަލުކުރެއްވުމަށްވެސް ވަނީ ހަމަޖެހިފައެވެ.