އިންޑިއާގެ 70ވަނަ ޖުމްހޫރީ ދުވަހުގެ މުނާސަބަތުގައި އެޤައުމުގެ ޚާރިޖީ ވަޒީރު، ސުޝްމާ ސްވަރާޖް އަށް ފޮރިން މިނިސްޓަރ އަބްދުﷲ ޝާހިދު ތަހުނިޔާ ވިދާޅުވެ މެސެޖެއް ފޮނުއްވައިފި އެވެ.
މިނިސްޓަރ ފޮނުއްވި މެސެޖުގައި އިންޑިއާގެ 70ވަނަ ޖުމްހޫރީ ދުވަހުގެ މުނާސަބަތުގައި އެޤައުމުގެ ޚާރިޖީ ވަޒީރަށާއި، ސަރުކާރަށާއި އަދި ރައްޔިތުންނަށް ވަރަށް ހޫނު މަރުޙަބާ އަކާއި ތަހުނިޔާއެއް ވިދާޅުވެފައި ވެއެވެ.
އަދި އިންޑިއާ އަކީ މުޅި ދުނިޔެއަށްވެސް ޑިމޮކްރެސީގެ ލާމަސީލު މިސާލެއް ކަމަށާއި، އިންޑިއާގެ ޤާނޫނު އަސާސީގައި ހިމެނިފައިވާ ހަމަހަމަ ޙައްޤުތަކާއި، އިންސާފާއި މިނިވަންކަމަކީ ރާއްޖެއިން ވެސް ޤަބޫލުކުރާ އުސޫލުތަކެއް ކަމަށާއި، ދެޤައުމުގެ ދެމެދުގައި ބިނާވެފައިވާ ވަރުގަދަ ސިޔާސީ ގުޅުމުގެ ބިންގަލަކީ އެ އުސޫލުތައް ކަމަށްވެސް މިނިސްޓަރގެ މެސެޖުގައި ފާހަގަކުރައްވާފައި ވެއެވެ.
ރާއްޖެ އާއި އިންޑިއާގެ ގުޅުންތައް މިހާރު ވަރަށް ރަނގަޅުކަން ފާހަގަކުރައްވައި މިނިސްޓަރ ވިދާޅުވީ ސިޔާސީ އަދި ވިޔަފާރީގެ ގުޅުންތައް ދުވަހުން ދުވަހަށް ވަރުގަދަވަމުންދާ ކަމަށެވެ. އަދި ތަރައްޤީގެ ބައިވެރިންގެ ގޮތުގައި އާއި ރަނގަޅު އަވަށްޓެރިންގެ ގޮތުގައި، ދެޤައުމުގެ ރައްޔިތުންނަށް ވެސް ފައިދާވާނެ ގޮތަކަށް މުސްތަޤްބަލުގައި ވެސް ދެޤައުމުގެ ރަހުމަތްތެރިކަން އިތުރަށް ބަދަހިވާނެކަމަށް ޤަބޫލުފުޅު ކުރައްވާ ކަމަށްވެސް މިނިސްޓަރގެ މެސެޖުގައި ވިދާޅުވެފައި ވެއެވެ.
މީގެ އިތުރުން މިނިސްޓަރގެ މެސެޖުގައި ވަނީ އިންޑިއާގެ ޚާރިޖީ ވަޒީރަށް ރަނގަޅު ސިއްޙަތަކަށާއި، އިންޑިއާގެ ރައްޔިތުންނަށް އަބަދުވެސް ތަރައްޤީ އާއި ފާގަތިކަމަށް އެދިވަޑައިގަންނަވާފަ އެވެ.