ޒެކް އެފްރޯންގެ އާ ފިލްމް، "އެކްސްޓްރީމްލީ ވިކެޑް، ޝޮކިންގްލީ އީވިލް އެންޑް ވައިލް"ގެ ފުރަތަމަ ޓްރެއިލާ ނެރެފި އެވެ.
މި އަހަރުގެ ސަންޑޭންސް ފިލްމް ފެސްޓިވަލްގައި ޕްރިމިއަރ ކުރާ މި ފިލްމްގައި ޒެކް ފެނިގެންދަނީ މަޝްހޫރު ސީރިއަލް ކިލާ، ޓެޑް ބަންޑީގެ ރޯލުންނެވެ. ޓެޑް ބަންޑީ އަކީ މުޅި އެމެރިކާގެ ތާރީޚުގައި ވެސް އުފެދުނު އެންމެ ބޮޑު އެއް ސީރިއަލް ކިލާ އެވެ. އެގޮތުން އޭނާ ވަނީ 30 އަށްވުރެ ގިނަ އަންހެނުންނަށް ޖިންސީ ގޯނާކޮށް މަރާލާފައިވާ ކަމަށް އެއްބަސްވެފަ އެވެ. ކޯޓު މަރުޙަލާ އަށްފަހު ޓެޑް ބަންޑީގެ މައްޗަށް ކުރި މަރުގެ ޙުކުމް ތަންފީޒްކޮށްފައި ވަނީ 1989 ވަނަ އަހަރު ފްލޮރިޑާ ގައެވެ. އޭނާ މަރާލާފައި ވަނީ ކަރަންޓުގައި ޖައްސައިގެންނެވެ.
ހުކުރު ދުވަހު ރިލީޒްކުރި އެ ފިލްމްގެ ޓްރެއިލާ އިން ފެނިގެންދަނީ ބަންޑީ ހައްޔަރުކުރުމާއި، ކޯޓު މަރުޙަލާތަކާއި، ޖަލުގައި ހޭދަކުރި ދުވަސްތަކުގެ ވާހަކައެވެ. މި ފިލްމްގައި ޓެޑް ބަންޑީގެ ލޯބިވެރިޔާ ކަމުގައިވާ ލިޒް ކްލޮޕްފަރގެ ރޯލުން ފެނިގެންދާނީ މަޝްހޫރު ތަރި ލިލީ ކޮލިންސް އެވެ.
މި ފިލްމްގެ ކާސްޓިންގ އަށް ގިނަ ބައެއްގެ ތަޢުރީފް ލިބެމުންދާއިރު، ބައެއް މީހުން ދަނީ ފިލްމާމެދު ކަންބޮޑުވުން ވެސް ފާޅުކުރަމުންނެވެ.