ހިތަދޫ ކެފޭއެއް ތެރޭގައި މީހަކު ނުކުޅެދުންތެރިކަން ހުންނަ މީހެއްގެ މޫނަށް އަނގަ ތެރޭ ހުރި ފެނާއި ކުޅު ޖަހައި، ހަމަލާ ދިން މައްސަލަ ބަލައި އެކަން ކުރި މީހާއާ ދޭތެރޭ ފިޔަވަޅު އެޅޭނެ ކަމަށް ޖެންޑަރ މިނިސްޓަރ ޝިދާތާ ޝަރީފް ވިދާޅުވެއްޖެއެވެ.
ޓުވިޓާގައި އާންމުވި ވީޑިއޯއަކާއެކު އާންމުންގެ ސަމާލުކަމަށް މިމައްސަލަ އައިސް، ފުލުހުންގެ ސަމާލުކަމަށް ވެސް ވަނީ ގެނެސްފައެވެ. ޑެޕިއުޓީ ކޮމިޝަނަރ އޮފް ޕޮލިސް، މުހައްމަދު ހަމީދު ވަނީ ރޭ، މިމައްސަލަ ހިތަދޫ ޕޮލިސް ސްޓޭޝަނުން ބަލަން ފަށާފައިވާކަން ހާމަކުރައްވާފައެވެ.
މިމައްސަލައާ ގުޅިގެން ޖެންޑަރ މިނިސްޓަރ ޝިދާތާ މިއަދު ކުރެއްވި ޓުވީޓެއްގައި ވިދާޅުވީ އެ ވީޑިއޯއިން ފެންނަ މަންޒަރަކީ އެއްވެސް ހާލަތެއްގައި ބަލައިގަނެވޭނެ އަމަލެއް ނޫން ކަމަށެވެ. "އުމުރުން ދުވަސްވީ ނުކުޅެދުންތެރިކަން ހުންނަ މީހަކަށް އަނިޔާކުރާ މަންޒަރު ދައްކުވައިދޭ ވީޑިއޯއިން ފެންނަނީ އެއްވެސް ޙާލަތެއްގައި ބަލައިނުގަނެވޭނެ، އަނިޔާވެރި ޢަމަލެކެވެ. މި ޢަމަލު ހިންގި ފަރާތާ މެދު އަޅަން ޖެހޭ ފިޔަވަޅުތައް އެޅުމަށް ބާރުއަޅައި މަސައްކަތްކުރަމުން ގެންދާނަމެވެ." މިނިސްޓަރުގެ ޓުވީޓުގައި ވިދާޅުވިއެވެ.
އާންމުންގެ ފާޑުކިޔުންތައް ވަރަށް ބޮޑަށް އަމާޒުވެފައިވާ މިމައްސަލައާ ގުޅޭގޮތުން ފުލުހުން އަދި ވަކި އެއްޗެއް ހާމަކޮށްފައެއް ނުވެއެވެ.