ދެކުނު ފިލިޕިންސްގެ ރޯމަން ކެތޮލިކް ޗާޗެއްގައި ދެ ބޮމެއް ގޮއްވާލައިގެން ދިން ހަމަލާއެއްގައި 20 މީހުން މަރުވެ، އިތުރު އެތައް ބަޔަކަށް އަނިޔާވެފައިވާ ކަމަށް އޮފިޝަލުން ބުނެފި އެވެ.
ފުރަތަމަ ބޮން ގޮއްވާލާފައި ވަނީ ޖޯލޯގެ ޗާޗެއްގައި އާދިއްތަ ދުވަހުގެ ބޮޑު ޖަމާޢަތުގައި މީހުން އަޅުކަންކުރަން ތިއްބައެވެ. އެ ހަމަލާއަށްފަހު ކާރު ޕާކްކުރާ ސަރަޙައްދުގައި އިތުރު ބޮމެއް ވަނީ ގޮއްވާލާފައެވެ.
މި ހަމަލާތަކުގެ ޒިންމާ އެއްވެސް ގްރޫޕަކުން މިހާތަނަށް ނަގާފައެއް ނުވެއެވެ. ނަމަވެސް ޖޯލޯ އަކީ އިސްލާމިސްޓް ހަނގުރާމަވެރިން، ޚާއްސަކޮށް އަބޫ ސައްޔާގް ގްރޫޕްގެ ހަނގުރާމަވެރިން ޙަރަކާތްތެރިވާ ސަރަޙައްދެކެވެ.
މި ހަމަލާތައް ދީފައި ވަނީ ފިލިޕިންސްގެ ގަޑިން ހެނދުނު 08:45 ހާއިރު، އަވާ ލޭޑީ އޮފް މައުންޓް ކާމެލް ޗާޗުގެ ތެރޭގަ އެވެ. މީގެ ކުރިންވެސް އެ ޗާޗަށް ވަނީ ބޮމުގެ ހަމަލާތައް ދީފައެވެ.
މި ހަމަލާތަކުގައި މަރުވި މީހުންގެ އަދަދު 27 އަށް އަރާކަމަށް ފުލުހުން ބުނި ނަމަވެސް، ފަހުން އެ އަދަދު ވަނީ 20 އަށް ރަނގަޅުކޮށްފަ އެވެ. މަރުވި ގިނަ މީހުންގެ ތެރޭގައި ހިމެނެނީ އާންމު ރައްޔިތުންނެވެ.