ގިނަ ބައެއްގެ މަޤްބޫލްކަން ހޯދާފައިވާ އިނގިރޭސީ ކްރައިމް ޑްރާމާ ސީރީސް "ކްރިމިނަލް މައިންޑްސް" 15 ވަނަ ސީޒަނަކަށް އާކޮށްފި އެވެ. އެ ސީޒަން ވެގެންދާނީ ސީރީސްގެ އެންމެ ފަހު ސީޒަނަށެވެ.
މި ސީރީސްގެ ފަހު ސީޒަންގައި ޖުމްލަ 10 އެޕިސޯޑް ހިމެނޭނެ އެވެ. އެ އެޕިސޯޑްތައް ވެސް ޝޫޓްކުރާނީ މިހާރު ޕްރޮޑިއުސްކުރަމުން އަންނަ 14 ވަނަ ސީޒަންގެ އެޕިސޯޑްތަކާއެކު އެވެ. އެންމެ ފަހު 10 އެޕިސޯޑާއެކު، ކްރިމިނަލް މައިންޑްގެ ޖުމްލަ 325 އެޕިސޯޑް ބެލުންތެރިންނާއި ހަމައަށް ގެނެސްދީފައިވާނެ އެވެ. މިއީ ޓީވީގެ ތާރީޚުގައި ވެސް އެންމެ ދިގު މުއްދަތަކަށް ދެމިގެންދާ އެއް ސީރީސް އެވެ.
މި ސީރީސްއިން މިހާރު ފެނިގެންދާ ތަރިންގެ ތެރޭގައި ޖޯއީ މެންޓެގްނާ، ޕެޖެޓް ބްރޫސްޓަރ، މެތިއު ގްރޭ ގަބްލަރ، އޭޖޭ ކުކް، އައިޝާ ޓައުލާ، ކާސްޓެން ވޭންގްސްނެސް، އެޑަމް ރޮޑްރިގެޒް އަދި ޑެނިއެލް ހެނީ ހިމެނެއެވެ.
މި ސީރީސް ބިނާކޮށްފައި ވަނީ ފެޑްރަލް ބިއުރޯ އޮފް އިންވެސްޓިގޭޝަން (އެފްބީއައި)ގެ ބިހޭވިއަރަލް އެނާލިސިސް ޔުނިޓް (ބީއޭޔޫ) ގައި މަސައްކަތްކުރާ މެމްބަރުން، ކުށްވެރިންގެ އުޅުމާއި އަޚްލާޤު އެނެލައިޒްކޮށްގެން، ކުށްތައް ތަހުޤީޤުކުރުމުގެ މައްޗަށެވެ.