2018 ވަނަ އަހަރު ޒީޓީވީއިން ދައްކަން ފެށި ސާރޭގާމާޕާ ސިންގިންގ ރިއަލިޓީ ޝޯވ އިޝިތާ ވިޝްވަކަރްމާ ކާމިޔާބުކޮށްފިއެވެ.
27 ވަނަ ދުވަހުގެ ރޭ ދެއްކި ގްރޭންޑް ފިނާލޭ ހަފްލާގައި އިންޑިއާގެ މަދްޔަޕްރަދޭޝް ޖަބަލްޕޫރްގެ އިޝިތާ މި މުބާރާތް ކާމިޔާބު ކޮށްފައިވަނީ ފައިނަލްގައި ސާހިލް ސޮލަންކީ، ސޯނީ ގިލް، އައިޝްވަރްޔާ ޕަންޑިތު، ތަންމޭ ޗަތުރްވެދީ އަދި އަސްލަމް އަބްދުލްމަޖީދުއާއި ވާދަކޮށްފައެވެ.
މި މުބާރާތުގެ ރަން އެއްވަނަ އިޝިތާ ހާސިލްކޮށްފައިވާއިރު މުބާރާތުގެ ދެވަނަ ހާސިލްކޮށްފައިވަނީ ތަންމޭއެވެ. އަދި ތިންވަނަ ހާސިލްކުރީ ސޯނީ ގިލްއެވެ.
މި މުބާރާތް ކާމިޔާބު ކުރުމުން އިޝިތާއަށް ވަނީ 5 ލައްކަ އިންޑިއަން ރުޕީސް، އަދި ހިޔުންޑޭ ކާރެއް ހަދިޔާއެއްގެ ގޮތުގައި ލިބިފައެވެ. އޭނާއަށް މުބާރާތުގެ ތާޖް އަދި ޝީލްޑް ހަވާލުކޮށްދިނީ ގްރޭންޑް ފިނާލޭގެ ޝަރަފްވެރި މެހުމާނާ ކަމަށްވާ ކަންގަނާ ރަނައުތުއެވެ.
އިޝިތާއަކީ ވަރަށް ޅައުމުރުގައި އިޖްތިމާއީ ހަރަކާތްތަކުގައި ބައިވެރިވެ ކުޑަކުދިން ކައިވެނި ކުރުވުމާއި ދެކޮޅުހަދާ އެކަމަށް މީހުން ހޭލުންތެރި ކުރުވުމަށް މަސައްކަތްކުރާ ޒުވާނެކެވެ. އޭނާގެ މި މަސައްކަތް ފެނި އޭނާވަނީ މަދްޔަޕްރަދޭޝްގެ ކުރީގެ ޗީޕް މިނިސްޓަރ ޝިވަރްޖް ސިންގ ޗޯހާން ކުރިޔަށް ގެންދާ ލާޑޯ އަބިޔާންގެ ބްރޭންޑް އެމްބަސެޑަރަކަށް ހަމަޖައްސާފައެވެ.
މި ޝޯވއަކީ ފެށުނީއްސުރެ ގިނަ ބައެއްގެ މަޤްބޫލްކަން ހޯދާފައިވާ ޝޯވއެކެވެ. މި މުބާރާތުގެ ޖަޖުންގެ ގޮތުގައި ހަރަކާތްތެރިވެފައިވަނީ ރިޗާ، ޝޭކަރް އަދި ވާޖިދުއެވެ.