ނިމިގެންދިޔަ ހަފްތާ ބަންދުގައި ދެއްކި އެފިސޯޑުތަކުން ކަލާސްއިން ދައްކަމުން އަންނަ "ޚަތުރޯންކީ ކިލާޅީ 9" ގެ ވައިލްޑްކާޑް ބައިވެރިއެއްގެ ގޮތުގައި ޝަމީތާ ޝެއްޓީވަނީ އެ ޓީމާއި ގުޅިފައެވެ.
26ވަނަ ދުވަހު އެޕިސޯޑުގައި ޝަމީތާ ބައިވެރިވުމުން އެންމެ ވަރުގަދަ ބައިވެރިއެއްގެ ގޮތުގައި ދެކެނީ ކާކުތޯ ކުރި ސުވާލަށް އޭނާ ބުނެފައިވަނީ އޭނާގެ ނަޒަރުގައި މިވަގުތު އެ ޝޯވގައި ހުރި އެންމެ ވަރުގަދަ ބައިވެރިއަކީ ޕުނީތު ޕާޓަކް ކަމަށެވެ.
އެރޭގެ އެޕިސޯޑުގައި ގެނެސްދިން ސްޓަންޓް ފުރަތަމަ ފުރިހަމަކުރަން ދިޔަ ބައިވެރިޔަކީ ޒެއިންއެވެ. އެޔަށްފަހު ޝަމީތާ އެ ޓާސްކް ފުރިހަމަ ކުރަން ދިޔުމުން ހަރްޝް ވަނީ ޝަމީތާއަށް އާދަޔާއި ޚިލާފަށް ތައުރީފް ކުރަން ފަށާފައެވެ. މިމަންޒަރު ފެނި އޭނާގެ އަނބިމީހާ ބާރްތީވަނީ އޭނާގެ ފިރިމީހާ އެފަދައިން ދުވަހަކުވެސް އޭނާއަށް ތައުރީފް ނުކުރާ ކަމަށް ބުނެ އެންމެން ހެއްވާލާފައެވެ.
މި ޝޯވ އެންމެ މަޖާކޮށް ގެނެސްދިނުމުގައި މުހިއްމު ރޯލެއް އަދާކުރާ ފަރާތަކީ މަޝްހޫރު ހެއްވާ މަޖާ ބައިތައް ކުޅޭ ބާރްތީއެވެ.
ފުރަތަމަ ސްޓަންޓް ނިމުނު އިރު ޕުނީތްވަނީ އެންމެ ފުރިހަމައަށް އެ ނިންމާފައިކަމުން ޒެއިންއަދި ޝަމީތާއަށް ވަނީ އާދައިގެމަތިން ނާކާމިޔާބުވާ ފަރާތްތަކަށް މި ޝޯވ ގައި ލިބޭ "ފިއަރ ބޭންޑް" ލިބިފައެވެ.
ޝަމީތާ ޝޯވއާއި ގުޅުނު ހިސާބުން ބާރްތީގެ ފިރިމީހާ ހަރްޝް ފެންނަނީ މުޅިންވެސް ޝަމީތާ ފަހަތުން އުޅޭތަނެވެ. އޭނާއާއި ކޮންމެވެސް ވާހަކައެއް ދައްކާލެވޭތޯ މަސައްކަތް ކުރެއެވެ. މި މަންޒަރުތައް ބާރްތީ އަދި ޖޭސްމިން ސިއްރުން މިމަންޒަރު ބަލަން ތިބެއެވެ.
އެކިވައްތަރުގެ ސޫފިތަކުގެ ތެރޭގައި ފުރިހަމަކުރަންޖެހޭ ޓާސްކްތައް މި ޝޯވގެ ބައިވެރިން ފުރިހަމަ ކުރަނީ ބައެއް ފަހަރު ރޮމުންނެވެ. އެހެން ސީޒަންތަކާއި ޚިލާފަށް ކުރިޔަށް ނުގެންގޮސް ގިނަ ބައިތަކެއް ބައިވެރިން ދޫކޮށްލާތަން ވެސް ފެނެއެވެ. އެގޮތުން މިހާރަކަށް ގެނެސްދިން މިފަދަ ޝޯވތަކުން މިއީ އެކަން އެންމެ ގިނައިން ހިނގާ ޝޯވކަމަށް ބުނެ ރޯހިތު ޝެއްޓީ ވަނީ ހިތްހަމަނުޖެހުން ވެސް ފާޅުކޮށްފައެވެ.