އިޓާލިއަން ސެރިއޭގައި ރޭ ރަށުން ބޭރުގައި ކުޅުނު މެޗުގެ ފަހު ވަގުތު ކްރިސްޓިއާނޯ ރޮނާލްޑޯ ވައްދާލި ޕެނަލްޓީއާއެކު ޔުވެންޓަސް އިން ފަހަތުން އަރައި ލާޒިއޯ ބަލިކޮށް ތާވަލްގެ ކުރީގައި 11 ޕޮއިންޓްގެ ލީޑެއް ނަގައިފިއެވެ.
ރޭގެ މޮޅާއެކު ލީގް ތާވަލްގެ އެއް ވަނަ މަގާމްގައި ޔުވެންޓަސް އޮތީ ކުޅުނު 21 މެޗުން ލިބުނު 59 ޕޮއިންޓާއެކު އެވެ. ލީގުގެ ދެވަނައިގައި 48 ޕޮއިންޓާއެކު އޮތް ނަޕޯލީ އާއި ހަތަރުވަނައިގައި އޮތް އޭސީ މިލާން މިދިޔަ ހޮނިހިރު ދުވަހުގެ ރޭ ކުޅުނު މެޗު ލަނޑެއްނުޖެހި ދެ ޓީމު އެއްވަރުވިއިރު 40 ޕޮއިންޓާއެކު ތިންވަނައިގައި އޮތް އިންޓަ މިލާން ވަނީ ރަށުން ބޭރުގައި ޓޮރީނޯ އަތުން ބަލިވެފައެވެ.
ލާޒިއޯގެ ދަނޑުގައި ރޭ ކުޅުނު މެޗު ފެށިގެން ބޯޅަ ކޮންޓްރޯލްކޮށްގެން ގިނަ ހަމަލާތައް އުފައްދައި ރަނގަޅަށް ކުޅެފައިވަނީ އެޓީމުންނެވެ. އެގޮތުން މެޗުގެ ފުރަތަމަ 20 މިނެޓުގެތެރޭގައި އެ ޓީމުގެ ވޮލަސް އާއި ވަކީން ކޮރެއާ ފޮނުވާލި ހަމަލާތައް ޔުވެންޓަސްގެ ގޯލްކީޕަރު ވޮޝިއެޗް ޝެޒްނީ މަތަކުރިއިރު އޭގެފަހުން ލާޒިއޯގެ ލުއިސް އަލްބާޓޯ އާއި މާކޯ ޕަރޮލޯ އަށް ލަނޑުޖެހުމަށް ލިބުނު ފުރުޞަތުތަކުގެ ހުރަހަކަށްވީ ވެސް ޔުވެންޓަސްގެ ކީޕަރު ޝެޒްނީ އެވެ. މީގެއިތުރުން، މި ހާފުގައި ލާޒިއޯގެ ޗީރޯ އިމޯބިލޭ ފޮނުވާލި ހަމަލާއެއް ޔުވެންޓަސްގެ ޑެނިއެލީ ރުގާނީ ވަނީ ގޯލްގެ ރޮނގުމަތިން ސަލާމަތްކޮށްފައެވެ. މި މެޗުގެ ފުރަތަމަ ހާފު ނިމުނީ ދެ ޓީމަށް ލަނޑެއްނުޖެހި އެއްވަރުވެގެންނެވެ.
ދެވަނަ ހާފު ފެށިގެން ކުރީކޮޅު ރަނގަޅަށް ކުޅެފައިވަނީ ވެސް ލާޒިއޯ އެވެ. އެގޮތުން، މެޗުގެ 59 ވަނަ މިނެޓުގައި ޔުވެންޓަސްގެ އެމްރޭ ޗާން އަތުން ބައިކޮޅަށް ވަން ގޯލަކުން ކުރީން ލީޑް ނެގީވެސް ލާޒިއޯ އެވެ. މިއީ ލާޒިއޯގެ ލުއިސް އަލްބާޓޯ ނަގައިދިން ކޯނަރެއް ދިފާއުކުރަންވެގެން ޔުވެންޓަސްގެ މިޑްފީލްޑަރު ޗޭން ބޮލުން ފޮނުވާލަން އުޅުމުގެ ތެރޭގައި ވަން ގޯލެކެވެ.
އޭގެފަހުން، ޔުވެންޓަސްގެ ޕައޮލޯ ޑިބާލާ އަށް ވަނީ ނަތީޖާ ހަމަހަމަކުރުމަށް ރަނގަޅު ފުރުޞަތެއްލިބި ބޭކާރުވެފައެވެ. އެ ޓީމުގެ ފެޑެރީކޯ ބާނަޑެސްކީ ދިން ބޯޅައަކުން ޕެނަލްޓީއޭރިޔާގެ މެދުތެރޭގައި ހުރެ ޑިބާލާ ފޮނުވާލި ބޯޅަ ލާޒިއޯގެ ގޯލްކީޕަރު ތޯމަސް ސްޓްރަކޯޝާ ވަނީ މަތަކޮށްފައެވެ.
ނަމަވެސް، އޭގެ ކުޑައިރުކޮޅެއްފަހުން، މެޗުގެ 74 ވަނަ މިނެޓުގައި މިހާފުގައި ކުޅެން ނިކުތް ޕޯޗުގަލްގެ ފުލްބެކް ޖޮއާއޯ ކަންސޭލޯ ވަނީ ޔުވެންޓަސް އަށް އެއްވަރުކޮށްދީފައެވެ.
އޭގެ ހަތަރު މިނެޓުފަހުން، ލާޒިއޯ އަށް އަލުން ލީޑްނަގައިދިނުމަށް ވަކީން ކޮރެއާ އަށް ލިބުނު ފުރުޞަތުގައި އޭނާ ފޮނުވާލި ބޯޅަ ޔުވެންޓަސްގެ ކީޕަރު ޝެޒްނީ މަތަކުރިއެވެ.
މެޗުގެ ފުރިހަމަ ވަގުތު ހަމަވާން ދެ މިނެޓަށްވެފައިވަނިކޮށް، ޔުވެންޓަސް އަށް ތިން ޕޮއިންޓް ކަށަވަރުކޮށްދިނީ ލިބުނު ޕެނަލްޓީއަކުން ރޮނާލްޑޯ އެވެ. މިއީ އެ ޓީމުގެ ކަންސޭލޯ އަށް ލާޒިއޯގެ ސެނަޑު ލުލިޗް ކުރި ފައުލަކަށް ރެފްރީ ދިން ޕެނަލްޓީއެކެވެ. ރޮނާލްޑޯ ވަނީ ވަރަށް ހަމަޖެހިލާފައި ގޯލް މަތީ ދާގަނޑަށް އަމާޒުކޮށްލައިގެން ޕެނަލްޓީ ކާމިޔާބުކޮށް ލީގުގައި 15 ވަނަ ގޯލް ޖަހައިދީފައެވެ.
ލީގުގައި އިއްޔެ ކުޅުނު އެހެން މެޗުތަކުގެ ނަތީޖާއަށް ބަލާއިރު، ކިއޭވޯ ވެރޯނާ އަތުން 4-3 އިން ފިއޮރެންޓީނާ މޮޅުވިއިރު ޕާމާ އަތުން ސްޕަލް މޮޅުވީ 3-2 އިންނެވެ. އެޓަލާންޓާ އާ ދެކޮޅަށް ރަށުން ބޭރުގައި ކުޅެ އޭއެސް ރޯމާ 3-3 އިން އެއްވަރުވިއިރު ފްރޮސިނޯނޭ އަތުން އަމިއްލަ ދަނޑުގައި ބޮލޯނިއާ ބަލިވީ 4-0 އިންނެވެ.