ޕެރަޑައިސް އައިލެންޑް ރިސޯޓުގައި މަރުވެފައި އޮތް ފަތުރުވެރިއަކު ފެނިއްޖެއެވެ.
އުމުރުން 36 އަހަރުގެ ޗައިނާ މީހާ މަރުވެފައި އޮއްވާ ފެނިފައި ވަނީ ރޭ 1:03 ގައި ކަމަށް ފުލުހުން މައުލޫމާތު ދެއެވެ. އެ އަންހެންމީހާ އަކީ ޗުއްޓީ ހޭދަކޮށްލުމަށް ރާއްޖެ އައި މީހެއް ކަމަށާއި އޭނާ މަރުވެފައި އޮއްވާ ފެނިފައި ވަނީ އޭނާ ދިރިއުޅުނު ކޮޓަރީގެ ތެރެއިން ކަމަށް ފުލުހުން ބުނެއެވެ.
އެމީހާ އޭޑީކޭއަށް ގެންދިޔައިރު ވެސް މަރުވެފައިވާ ކަމަށް ފުލުހުން ބުނެއެވެ. މިއީ މިމަހުގެ ތެރޭގައި ޕެރަޑައިސް ރިސޯޓުގައި މަރުވި ތިން ވަނަ ފަތުރުވެރިޔާއެވެ. އެގޮތުން މިމަހުގެ 16 ވަނަ ދުވަހު ސްނޯކްލިންއަށް ގޮސް އުޅުނު 66 އަހަރުގެ ކޮރެއާ އަންހެނަކު މަރުވިއިރު މިމަހުގެ 19 ގައި ވަނީ އެރިސޯޓުގެ މޫދުގައި ވެސް ފަތުރުވެރިއަކު މަރުވެފައި އޮއްވާ ފެނިފައެވެ.
މޫދަށް އެރިއުޅެނިކޮށް ދިމާވާ ހާދިސާތަކުގައި ފަތުރުވެރިން މަރުވާ މައްސަލަތައް މިހާރު ވަރަށް ބޮޑަށް އިތުރުވެފައިވާތީ ޓޫރިސްޓު ޕްރޮޕަޓީތައް އިންސްޕެކްޓު ކުރަން ޓޫރިޒަމް މިނިސްޓްރީން ނިންމާފައިވެއެވެ.