އޭޝިއަން ކަޕްގެ ސެމީ ފައިނަލްގެ ފުރަތަމަ މެޗުގައި އިރާން ބަލިކޮށް ޖަޕާން ފައިނަލަށް ދަތަރުކޮށްފިއެވެ. މި މެޗުން ޖަޕާން މޮޅުވީ 3-0 އިންނެވެ.
މިއީ 1992 ވަނަ އަހަރުގެ ފަހުން އޭޝިއަން ކަޕްގެ ފައިނަލަށް ޖަޕާން ދަތުރުކުރި ފަސް ވަނަ ފަހަރެވެ. މީގެކުރީން، އެ ޓީމު ވަނީ މި މުބާރާތް ހަތަރު ފަހަރު ކާމިޔާބުކޮށްފައެވެ.
އަބޫ ދާބީގައި ހާޒާ ބިން ޒައިދު ސްޓޭޑިއަމްގައި ރޭ ކުޅުނު މެޗުގެ ފުރަތަމަ ހާފުގައި ދެ ޓީމަށްވެސް ލަނޑުޖަހާނެ މާ ގިނަ ފުރުޞަތުތަކެއް ތަނަވަސްކުރެވިފައިނުވާއިރު މި ހާފުގައި ލަނޑުޖެހުމަށް އެންމެ ރަނގަޅު ދެ ފުރުޞަތުވެސް ލިބުނީ އީރާނަށެވެ. އެގޮތުން، އެ ޓީމުގެ ފޯވާޑް ސަރްދާރް އަޒްމޫން ފޮނުވާލި ދެ ހަމަލާވެސް ޖަޕާނުގެ ގޯލްކީޕަރު ޝުއިޗީ ގޮންޑާ މަތަކުރިއެވެ. މި މެޗުގެ ފުރަތަމަ ހާފު ނިމުނީ ދެ ޓީމަށް ލަނޑެއްނުޖެހި އެއްވަރުވެގެންނެވެ.
ދެވަނަ ހާފުގެ ކުޅުން ފެށިތާ ކުޑައިރުކޮޅެއްގެ ތެރޭގައި ޖަޕާނުގެ ފުރަތަމަ ލަނޑުޖަހައިދިނީ ޔޫޔާ އޮސާކޯ އެވެ. މިއީ އެ ޓީމުގެ ޓަކޫމީ މިނަމީނޯ ނަގައިދިން ހުރަހަކުން ލިބުނު ބޯޅައެއް އޮސާކޯ ބޮލުން ފޮނުވާލައިގެން ކާމިޔާބުކުރި ގޯލެކެވެ.
މެޗުގެ 67 ވަނަ މިނެޓުގައި އިރާނުގެ ކުޅުންތެރިއެއް ބޯޅައިގައި އަތްލުމުން ރެފްރީ ވަނީ ޖަޕާނަށް ޕެނަލްޓީއެއް ދީފައެވެ. މި ޕެނަލްޓީ ގޯލްގެތެރެއަށް ވައްދާލުމަށްފަހު ޖަޕާނުގެ ލީޑް އިތުރަށް ފުޅާކޮށްދިނީ ވާޑާ ބްރޭމަން އަށް ކުޅެމުން އަންނަ ފޯވާޑް އޮސާކޯ އެވެ. މިއީ މި މެޗުގައި އޭނާ ކާމިޔާބުކުރި ދެވަނަ ގޯލެވެ.
ޖަޕާނުގެ ފަހު ލަނޑު، އިތުރު ވަގުތުގެ ފުރަތަމަ މިނެޓުގައި ކާމިޔާބުކޮށްދިނީ ޖެންކީ ހަރަގޫޗީ އެވެ. މިލަނޑުޖެހުމަށް އެހީތެރިވެދިނީވެސް މިނަމީނޯ އެވެ.
މި މުބާރާތުގެ ފައިނަލްގައި ޖަޕާން ނިކުންނާނީ މިރޭ ޔޫއޭއީ އާ ގަތަރު ބައްދަލުކުރާ މެޗުން މޮޅުވާ ބަޔަކާ ދެކޮޅަށެވެ. ސެމީގެ ދެވަނަ މެޗު ފެށުމަށް ހަމަޖެހިފައިވަނީ ރާއްޖޭގަޑިން މިރޭ 19:00 ގައެވެ.