ފްރާންސުގެ 'ސްޕައިޑަމޭން' ފިލިޕިންސްގައި ހައްޔަރުކޮށްފި

އުސް އިމާރާތްތަކަށް އެރުމަށް މަގްބޫލުވެފައިވާ އެލެއިން ރޮބާޓް، އާންމު ނަމުން ނަމަ 'ފްރެންޗް ސްޕައިޑަމޭން' ފިލިޕިންސްގައި ހައްޔަރުކޮށްފިއެވެ.

އޭނާ ހައްޔަރުކުރީ ފިލިޕިންސްގެ ޖީޓީ އިންޓަނޭޝަނަލް ޓަވަރަށް އެއްވެސް ރައްކާތެރިކަމެއް ނެތި އެރުމުންނެވެ. އެއީ ދިގުމިނުގައި 700 ފޫޓު އުސް އިމާރާތެކެވެ.

ސޭފްޓީ ބެލްޓެއް ފަދަ ރައްކާތެރިކަމުގެ އެއްވެސް ފިޔަވަޅެއް އެޅުމެއް ނެތި ރޮބާޓް ވަނީ އިމާރާތަށް އަރާފައެވެ. ސޯޝަލް މީޑިޔާގައި އެތައް ބަޔަކު ވަނީ ފޮޓޯތަކާއި ވީޑިއޯތައް އާންމުކޮށްފައެވެ. ފުލުހުން އޭނާ ހައްޔަރުކޮށްގެން ދިޔައިރު ރޮބާޓް ވަނީ އޭނާއަކީ "ބޭޑްއޭސް" އެއް ކަމަށް ބުނެފައެވެ.

އުސް ތަންތަނަށް އެރުމުގެ ދުނިޔޭގެ ރެކޯޑުވެސް ހޯދާފައިވާ ރޮބާޓް ވަނީ މީގެ ކުރިން ވެސް މިފަދަ އުސް އިމާރާތްތަކަށް އެރުމުން ހައްޔަރުކޮށްފައެވެ. ރޮބާޓް ވަނީ ބުރުޖު ޚަލީފާ، އައިފެލް ޓަވަރ، އެމްޕަޔަރ ސްޓޭޓް ބިލްޑިން ފަދަ އުސް އިމާރާތްތަކަށް މީގެ ކުރިން ވެސް އަރާފައެވެ.