އިސްލާމް ދީނާއި ދިވެހި ގައުމު ހިމާޔަތްކޮށް، ދިފާއުކުރުމުގައި ވާން ޖެހުނު ކޮންމެ ގުރުބާނީއެއް، އަޅަން ޖެހުނު ކޮންމެ ފިޔަވަޅެއް ވެސް އަޅާނެ ކަމަށް ހޯމް މިނިސްޓަރ ޝެއިޚް އިމްރާން އަބްދުﷲ ވިދާޅުވެއްޖެއެވެ.
ކުރީގެ ނައިބު ރައީސް އަހުމަދު އަދީބުގެ ބަންދާ ގުޅިގެން މިނިސްޓަރު އަމަލު ކުރައްވާ ގޮތުން އެމްޓީޑީގެ ސަޕޯޓަރުންގެ ފާޑުކިޔުންތައް އިމްރާނަށް ވަނީ އަމާޒުވެފައެވެ. އަދީބު ބޭސްފަރުވާއަށް ފަހު ޖަލަށް ބަދަލުކުރީ މުއްދަތު ހަމަނުވަނީސް ކަމަށް އާއިލާއިން ބުނި ނަމަވެސް އިމްރާން ވަނީ އެކަމާ ދެކޮޅު ހައްދަވައި އަދީބު ޖަލަށް ބަދަލުކޮށްފައެވެ.
ހައިކޯޓަށް އަދީބުގެ ފަރާތުން ވަނީ ގޭބަންދަށް ބަދަލުކޮށްދިނުމަށް މައްސަލައެއް ހުށައަޅާފައެވެ. އެ މައްސަލާގައި ގޮތެއް ނިންމަންދެން އިއްޔެ އެކޯޓުން ވަނީ އަދީބު ގޭބަންދަށް ބަދަލުކުރަން ކަމާ ބެހޭ ހުރިހާ އިދާރާއަކަށް އަމުރުކޮށްފައެވެ.