ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ބަންގްލަދޭޝް އަދި ތައިލެންޑްގައި ވެސް ވޯޓު ފޮށި ބެހެއްޓުމަށް އިލެކްޝަންސް ކޮމިޝަން (އީސީ) އިން ނިންމައިފި އެވެ.
މިދިޔަ ސެޕްޓެމްބަރު މަހުގެ 23 ވަނަ ދުވަހު ބޭއްވި ރިޔާސީ އިންތިޚާބުގެ ވޯޓު ފޮށި ބަހައްޓާފައި ވަނީ އިންޑިއާ އާއި ސްރީލަންކާގެ އިތުރުން މެލޭޝިއާގަ އެވެ. ނަމަވެސް މިފަހަރު އީސީ އިން ވަނީ އެ ލިސްޓަށް ބަންގްލަދޭޝް އާއި ތައިލެންޑް އިތުރުކުރުމަށް ނިންމާފައެވެ.
އީސީގެ މެމްބަރު އަހްމަދު އަކްރަމް އާއި ހަވާލާދީ "މިހާރު" ނޫހުން ރިޕޯޓްކުރާ ގޮތުގައި 100 އަށްވުރެ ގިނަ މީހުން ރީރަޖިސްޓްރީވާ ޤައުމްތަކުގައި ވޯޓު ފޮށި ބަހައްޓާނެ ކަމަށާއި، މި ފަހަރު ބޭރު ޤައުމްތަކުގައި ބަހައްޓާ ވޯޓު ފޮށީގެ އަދަދު އިތުރުވާނެ ކަމަށެވެ.
އީސީ އިން މިގޮތަށް ނިންމާފައިވާއިރު، ބަންގްލަދޭޝް އަދި ތައިލެންޑަކީ ވެސް ގިނަ އަދަދެއްގެ ދިވެހިން ދިރިއުޅެމުންދާ ދެ ޤައުމެވެ. އެގޮތުން މަތީ ތާއުލީމު ހާސިލްކުރުމަށް ބަންގްލަދޭޝްގައި ގިނަ ދިވެހި ދަރިވަރުން ދިރިއުޅެމުންދާއިރު، ތައިލެންޑް އަކީ ވިޔަފާރި ކުރުމަށާއި ޗުއްޓީ ހޭދަކުރުމަށް ދިވެހިންގެ ތެރޭގައި ވަރަށް މަޤްބޫލް މަންޒިލެކެވެ.
މި އަހަރުގެ ރައްޔިތުންގެ މަޖިލީހުގެ އިންތިޚާބުގައި ވޯޓު ލުމުގެ ޙައްޤު 264،589 މީހުންނަށް ލިބިގެންވެއެވެ. އަންނަ އޭޕްރީލް މަހުގެ ހަވަނަ ދުވަހު ބާއްވާ މި އިންތިޚާބަށް ކުރިމަތިލުމަށް އަންނަ މަހުގެ 21 ވަނަ ދުވަހާއި ހަމައަށް ހުޅުވާލާފައިވާއިރު، މަޖިލީހުގެ ޖުމްލަ 87 ދާއިރާއަކަށް މެމްބަރުން އިންތިޚާބު ކުރާނެ އެވެ.