ކުރިއަށް އޮތް ރައްޔިތުންގެ މަޖިލީހަށް ފޭދޫ ދާއިރާގެ މެމްބަރު އިބްރާހިމްދީދީ (އައިބީ)، އަމިއްލަ ގޮތުން ވާދަކުރައްވަން ނިންމަވައި އިލެކްޝަންސް ކޮމިޝަނަށް ފޯމު ހުށައަޅައިފިއެވެ.
އައިބީގެ ކެމްޕޭނުގައި މިދިޔަ ފަހަރުވެސް ވަރަށް އިސްކޮށް ހަރަކާތްތެރިވި އީނާ ވަނީ ސޯޝަލް މީޑިޔާގައި މިކަން ކަށަވަރުކޮށްދީފައެވެ.
6 April 2019 vaa honihiru dhuvahu beyvumah hamajehifaivaa rayyithunge majileehuge inthihaabugai #Feydhoo dhaaira ah Amiylagothun kurimathilehvum ah miaahru ves #Feydhoo dhaairaa thamseel kurahvamun gendhavaa izaatheri MP IB miadhu EC ah form hushahalhuvaifi.#majilis2019 #IBsalhi pic.twitter.com/vlYL3QBjDB
— Een 🌸 (@EenInoo) February 12, 2019
އައިބީ މީގެ ކުރިން، "އައްޑޫލައިވް" އަށް މައުލޫމާތު ދެއްވަމުން ވިދާޅުވީ ކުރިއަށް އޮތް މަޖިލީހުގައި އެއްވެސް ޕާޓީއެއް ތަމްސީލުނުކޮށް، ރައްޔިތުން ތަމްސީލު ކުރެއްވުމަށް ބޭނުންފުޅުވާ ކަމަށެވެ. އަދި ރާއްޖޭގެ ސިޔާސީ މަސްރަހު މިހާރު އޮތް ގޮތުން، ކުރިއަށްދާން އޮތް އެންމެ ރަނގަޅު ގޮތަކީ އަމިއްލަ ގޮތުން އިންތިޚާބަށް ނިކުތުން ކަމަށް އައިބީ ވިދާޅުވިއެވެ.
ކުރީގެ ރައީސް ޔާމީންގެ ސަރުކާރުގައި އެމަނިކުފާނުގެ ރިޔާސަތު އެންމެ ބޮޑަށް ދިފާއު ކުރެއްވި އެއް މެމްބަރު އައިބީއަށް ޔާމީން ވަނީ ޕީޕީއެމްގެ ޓިކެޓު ވެސް ދެއްވާފައެވެ. ނަމަވެސް ޔާމީން ޕީއެންސީގެ ނަމުގައި އާ ޕާޓީއެއް ހައްދަވާފައިވާއިރު އަދި މަޖިލިސް އިންތިޚާބާ ގުޅޭގޮތުން ޕީއެންސީގެ ރަސްމީ ސްޓޭންޑެއް ހާމަކޮށްފައެއް ނުވެއެވެ. ބެލެވޭ ގޮތުގައި ޕީޕީއެމުން ޓިކެޓު ދިން މެމްބަރުންނަށް ޕީއެންސީގެ ޓިކެޓުވެސް ލިބިގެންދާނެ ކަމަށެވެ.
ނަމަވެސް އައިބީ ވަނީ ޕީއެންސީއަށް މެމްބަރުން ހޯދުމަށް ޕީޕީއެމް ލީޑަޝިޕުން ކުރެއްވި މަސައްކަތުގައި ބައިވެރިވެވަޑައިގަންނަވާފައެވެ.
ފޭދޫ ދާއިރާއަށް ދެވަނަ ދައުރަކަށް އައިބީ ކުރިމަތިލައްވާއިރު ފާއިތުވި ފަސް އަހަރަކީ ފޭދޫގެ މަޖްލިސް މެމްބަރެއްގެ ގޮތުގައި އައިބީ ހުންނަވައި ފޭދޫއަށް ގިނަ ތަރައްޤީ ގެނެސްފައިވާ ފަސް އަހަރެވެ. އެގޮތުން ފޭދޫއަށް ދިމާވެފައިވާ ބިމުގެ ދަތިކަމުގެ މައްސަލަ ހައްލު ކުރުމަށް ފޭދޫގެ ވަށައިގެން ބިން ހިއްކައި، ހިއްކި ތަނުގައި ވަނީ ރިވެޓްމަންޓު ޖަހާފައެވެ. އަދި ފޭދޫ ސްކޫލަށް އިމާރާތެއް އިތުރުކޮށް، ރަށުގައި ސާފު ބޯފެނާއި ނަރުދަމާގެ މަސައްކަތް ވަނީ ފުރިހަމަ ކުރުވާފައެވެ.
ފޭދޫގައި ފެންބޮޑުވެ އާއްމު ރައްޔިތުންނަށް ލިބެމުންދާ ގެއްލުން ހައްލު ކުރުމަށް ފޭދޫގެ ފެން ހިންދާ ނިޒާމަށް ބޭނުންވާ ފައިސާ ބަޖެޓުގައި ހިމަނައިގެން އެމަސައްކަތް ވަނީ ފުރުހަމަ ކުރުވާފައެވެ.