މިހަފްތާތެރޭ އައްޑޫ ސިޓީ ހިތަދޫ ސައި ހޮޓަލެއްގެ ތެރޭގައި އުމުރުން ދުވަސްވީ މީހަކަށް އަނިޔާކުރި މައްސަލަ ބަލަމުންދާ ކަމަށް މޯލްޑިވްސް ޕޮލިސް ސާވިސް އިން ހާމަކޮށްފިއެވެ.
ހޮނިހިރު ދުވަހުގެރޭ ސޯޝަލް މީޑިޔާގައި އާންމުވި ވީޑިއޯއަކުން ގިނަ ބަޔެއްގެ ސަމާލުކަމަށް އައި މިމައްސަލަ ހިތަދޫ ޕޮލިސް ސްޓޭޝަނުން ބަލަން ފަށާފައިވާ ކަމަށް ހަމަ އެރޭ، އެކްޓިން ކޮމިޝަނަރ އޮފް ޕޮލިސް މުހައްމަދު ހަމީދު ވަނީ ވިދާޅުވެފައެވެ.
އަދި އެއަށް ފަހު ޖެންޑަރ މިނިސްޓަރ ޝިދާތާ ޝަރީފް ވަނީ، ޖެހިގެން އައި އާދީއްތަ ދުވަހު އެކަން ކުށްވެރިކޮށް، އެކަން ކުރި މީހަކާ ދެކޮޅަށް ފިޔަވަޅު އެޅޭނެ ކަމަށް ވިދާޅުވެފައެވެ. "އުމުރުން ދުވަސްވީ ނުކުޅެދުންތެރިކަން ހުންނަ މީހަކަށް އަނިޔާކުރާ މަންޒަރު ދައްކުވައިދޭ ވީޑިއޯއިން ފެންނަނީ އެއްވެސް ޙާލަތެއްގައި ބަލައިނުގަނެވޭނެ، އަނިޔާވެރި ޢަމަލެކެވެ. މި ޢަމަލު ހިންގި ފަރާތާ މެދު އަޅަން ޖެހޭ ފިޔަވަޅުތައް އެޅުމަށް ބާރުއަޅައި މަސައްކަތްކުރަމުން ގެންދާނަމެވެ." މިނިސްޓަރު ކުރެއްވި ޓުވީޓެއްގައި ވިދާޅުވިއެވެ.
މިމައްސަލައިގެ ތަފްސީލެއް ހޯދުމަށް "އައްޑޫލައިވް" އިން ޖެންޑަރ މިނިސްޓްރީ އަށް ގުޅުމުން މިނިސްޓްރީން މައުލޫމާތު ދީފައިވާ ގޮތުގައި މިނިސްޓަރު ވަނީ ޕޮލިސް ކޮމިޝަނަރަށް ގުޅުއްވައި މައްސަލަ ބަލައިދިނުމަށް އެދިވަޑައިގެންފައެވެ.
މިމައްސަލައާ ގުޅިގެން ފުލުހުންގެ މީޑިޔާ އޮފިޝަލް ވިދާޅުވީ މައްސަލަ އަދިވެސް ކުރިއަށް ދާ ކަމަށެވެ. ތަހުގީގު ކުރަމުންދާ މައްސަލައަކަށް ވާތީ އިތުރު ތަފްސީލެއް ދެއްވުމަށް ފުލުހުން ދެކޮޅު ހެދި ނަމަވެސް އެ މައްސަލައިގެ ތަހުގީގު ކުރިއަށްދާކަމުގެ ޔަގީންކަން ފުލުހުން ވަނީ ދެއްވާފައެވެ.
ސޯޝަލް މީޑިޔާގައި އާންމުވި ވީޑިއޯ އިން ފެންނަ ގޮތުގައި ދުވަސްވީ މީހާގެ މޫނަށް ކެފޭ ތެރޭގައި މީހަކު ވަނީ އަނގަ ދޮވުނު ފެން ޖަހާފައެވެ. އަދި އެއަށްފަހު އެމީހާގެ މޫނަށް އޭނާ ކުޅު ޖެހި މަންޒަރުވެސް ފެނިގެން ދިޔައެވެ. އެނގިފައިވާ ގޮތުގައި އެމީހާއަކީ ނުކުޅެދުންތެރިކަން ހުންނަ މީހެކެވެ. އެސަރަހައްދުގައި އޭނާއަށް މިފަދަ އަނިޔާތަކާއި ފުރައްސާރަ ކުރުންތައް އާންމުކޮށް ލިބޭ ކަމަށް "އައްޑޫލައިވް" އަށް ޚަބަރު ލިބިފައިވެއެވެ.