ކުށްމަދު މުޖުތަމަޢެއް ބިނާ ކުރުމަށްޓަކައި ޢާންމުންނާއި ފުލުހުންނާ ދެމެދު ހަރުދަނާ ރަނގަޅު ގުޅުމެއް ޤާއިމުވެފައި އޮތުމަކީ ވަރަށް މުހިއްމު ކަމެއް ކަމުގައި މިހާރު ރާއްޖެ އަށް ރަސްމީ ދަތުރުފުޅެއް ކުރައްވަމުން ގެންދަވާ ސްރީލަންކާގެ އިންސްޕެކްޓަރު ޖެނެރެލް އޮފް ޕޮލިސް (އައިޖީޕީ) މރ. އެންކޭ އިލަންގަކޫން ވިދާޅުވެއްޖެ އެވެ.
އެ މަނިކުފާނު މިހެން ވިދާޅުވީ އައިލްސްއިން މިއަހަރުގެ ފުރަތަމަ ކުއާޓަރުގައި ހިންގި ކޯސްތަކުގެ ދަސްވެނިވުން ފާހަގަ ކުރުމަށް އިއްޔެ އިސްކަންދަރު ބިލްޑިންގައި ބޭއްވި ރަސްމިއްޔާތުގެ ޝަރަފުވެރި މެހެމާނެއްގެ ހައިސިއްޔަތުން ބައިވެރި ވެވަޑައިގެން ފުލުހުންނާ މުޚާތަބުކުރައްވާ ވާހަކަފުޅު ދައްކަވަމުންނެވެ.
ސްރީލަންކާ ޕޮލިސްގެ އައިޖީޕީ ވިދާޅުވީ ފުލުހުންނާއި ޢާންމުންނާއި ދެމެދު ހަރުދަނާ ގުޅުމެއް އުފެއްދުމަށްޓަކައި ކޮމިއުނިޓީ ޕޮލިސިން އަށް ފުލުހުން އަހުލުވެރި ވާން ޖެހޭ ކަމަށެވެ. އަދި ރައްޔިތުންނާއި ގުޅިގެން ފުލުހުން މަސައްކަތް ކުރަން ޖެހޭ ކަމަށެވެ.
މި މޭރުމުން ވާހަކަފުޅު ދައްކަވަމުން އެ މަނިކުފާނު ވިދާޅުވީ ދުނިޔޭގެ ހުރިހާ ކަންކޮޅުތަކެއްގައި މަސައްކަތް ކުރާ ފުލުހުންނަށް ވެސް އޮތް އެންމެ ބޮޑު ގޮންޖެހުމަކީ ޢާންމު ރައްޔިތުންގެ އިތުބާރާއި ރައްޔިތުންގެ އެއްބާރުލުން ހޯދުން ކަމަށެވެ.