ޖުމުހޫރީ ޕާޓީގެ ޓިކެޓުގައި މަޖިލީހަށް ވާދަކުރުމުގެ ފުރުސަތު ދެވޭނީ ހޮވޭނެ ކަމަށް ބެލެވޭ މީހުންނަށް ކަމަށް އެޕާޓީގެ ލީޑަރ ގާސިމް އިބްރާހިމް ވިދާޅުވެއްޖެއެވެ.
ޖުމުހޫރީ ޕާޓީގެ ކައުންސިލުން ވަނީ ޕާޓީ ޓިކެޓު ދޭނެ މީހުން ކަނޑައެޅުމުގެ ބާރު، ޕާޓީގެ ލީޑަރ ގާސިމް އިބްރާހިމަށް ދިނުމަށް ނިންމާފައެވެ. ޓިކެޓު ދިންއިރު ދާދި ފަހުން ޖޭޕީއަށް ސޮއިކުރި ވަރަށް ގިނަ މީހުންނަށް އިސްކަން ދީފައިވާކަން ފާހަގަކޮށްލެވެއެވެ.
އެކަމާ ގުޅިގެން ގާސިމް ވިދާޅުވީ ވިހި އަހަރު ޕާޓީގައި ހުރި މީހަކަށް ވިޔަސް ނުހޮވޭނެ ކަމަށް ވަންޏާ އެމީހަކަށް ޓިކެޓު ނުދެވޭނެ ކަމަށެވެ. "މިއަދު އަޔަސް، މާދަމާ އަޔަސް އައިސް ސޮއިކޮށްލީމަ ޓިކެޓް ދޭނަން އޭނާ އަކީ ގާބިލް މީހެއްވިއްޔާ." ގާސިމް ވިދާޅުވިއެވެ.
ކުރީ ސަރުކާރުގެ އިސް މަގާމުތަކުގައި ތިއްބެވި ބޭފުޅުން ޖުމުހޫރީ ޕާޓީއާ ގުޅުމުން އެ މީހުންނަށް ޓިކެޓު ދިނުމުން ޕާޓީގައި ގިނަ ދުވަސްވީ ބައެއް ފަރާތްތަކުން އަންނަނީ ހިތްހަމަނުޖެހުން ފާޅުކުރަމުންނެވެ. އެގޮތުން ކުރީގެ އެކްޓިން ޕޮލިސް ކޮމިޝަނަރ އަބްދުﷲ ނަވާޒް ޖޭޕީއާ ގުޅުމުން ގަލޮޅު ދެކުނުދާއިރާގެ ޓިކެޓު އޭނައަށް ވަނީ ލިބިފައެވެ. އަދި ކުރީގެ ޔޫތް މިނިސްޓަރ އިރުތިޝާމް އާދަމަށް ވަނީ ހެންވޭރު ދެކުނުގެ ޓިކެޓު ދީފައެވެ.
ޖޭޕީ ޕާލަމެންޓްރީ ގްރޫޕުގައި މިހާރު ތިބި މެމްބަރުންގެ ތެރެއިން ދިއްދޫ ލަތީފް އަދި ފަރެސްމާތޮޑާ މެމްބަރު ހުސެއިން މުހައްމަދު ލަތީފް ފިޔަވައި އެހެން ހުރިހާ މެމްބަރުންނަށް ވަނީ ޓިކެޓުތައް ދީފައެވެ. އިލްހާމް ފިޔަވައި އެހެން ހުރިހާ މެމްބަރުން ވާދަކުރަނީ މިދިޔަ ފަހަރުވެސް ވާދަކުރި ދާއިރާތަކަށެވެ. އިލްހާމް ވާދަކުރަނީ މިފަހަރު އިނގުރައިދޫ ދާއިރާއަށެވެ. އިލްހާމް މިދިޔަ ފަހަރު ވާދަކުރި ދަނގެތީ ދާއިރާއަށް ޖޭޕީ ޓިކެޓުގައި މިފަހަރު ވާދަކުރަނީ ކާނަލް ނާޒިމެވެ.